Агнешка Радванска е во големи проблеми. Болките во стопалото се толку силни поради што полска тенисерка размислува за завршување на кариерата иако во март оваа година го прослави 29 роденден.
„Ова е проблем што не може да се отстрани со операција. Нема решение. Без разлика дали носам штикли или патики, болката во стопалото е подеднакво силна. Едноставно, толку е уништено од трчање што не може да издржи подолг напор“, изјави Радванска за „Еуроспорт“.
Во 2018 година речиси и да ја немаше во ВТА турот. Најдобриот резултат го забележа во Истбурн, турнир што служи како подготвителен и за загревање пред Вимблдон. Таму стигна до полуфинале како нејзин најдобар настап во оваа сезона.
„Стопалото брзо за воспалува. Има ноќи во кои ме будат грчеви и ниту една инјекција не помага“, открива некогаш втората светска тенисерка.
Таа, сепак, не губи верба дека ќе се опорави и дека ќе може да продолжи со уживање во тениската игра како нејзин активен учесник, но призна дека не е сигурна во тоа. Наскоро најави дека ќе донесе одлука што понатаму.
„Моите планови засега се поврзани за рехабилитација. Наредната недела ќе знам кога ќе се вратам на терен, но и дали воопшто ќе можам. Сè уште немам пријавено настап за ниту еден турнир во 2019 година бидејќи не знам што ќе биде. Моментно сум меѓу чеканот и наковалната“, заклучи Агнешка Радванска.
Полската тенисерка која во 2012 година играше за титула на Вимблдон во моментот е на 75. место на ВТА ранг листата.