ЖРК Вардар со победа ја отвори новата сезона во ракометната Лига на шампиони. „Црвено-црните“ девојки во премиерата на групната фаза триумфираа против Ференцварош со 34:31 (20:11) како еден вид на подгревање на надежите дека токму ова издание од елитното натпреварување на ЕХФ можеби е нивно за, конечно, и тие да се вратат во Скопје со посакуваниот трофеј од завршниот турнир.
Одлично прво полувреме и осцилаторно второ одиграа вардарки против унгарскиот гостин во СЦ „Јане Сандански“, но залихата од воведните 30 минути се покажа доволна за славје на крајот. По избалансираниот почетокот и резултатскиот егал (10:10) до средина на воведниот дел, домашните ракометарки одиграа фуриозно и со серија од 8:0 направија голем исчекор што беше пресуден за архивирање на првите бодови во групата во која уште се Тирингер и Ларвик.
Огромно влијание во нападот имаше Драгана Цвијиќ, српската репрезентативка која меѓу двете сезони пристигна во Скопје од екипата на Будуќност. Дебито во „црвено-црниот“ дрес го одбележа со седум гола колку што постигна Андреа Лекиќ, по еден помалку од нив реализираа Андреа Пенезиќ и Александра Лакрабер. Прв стрелец кај гостинките од Будимпешта беше Фалувеги со седум погодоци.
ЖРК Вардар во второто коло, на 15 октомври, ќе гостува во Германија на тимот на Тирингер.
ЖРК Вардар – Ференцварош 34:31 (20:11)
Сала: СЦ „Јане Сандански“. Гледачи: 1,500. Судии: Јоана Бремер и Агнешка Сковронек (двете од Полска)
ЖРК Вардар: Лејно (6 одбрани), Суслина (5 одбрани), Радичевиќ 2, Кликовац, Саздовска, Кузнецова 1, Лазович 1, Пенезиќ 6, Керамичиева, Чанадија 3, Лакрабер 6, Хмирова, Цвијиќ 7, Лекиќ 7, Петровиќ, Ристовска 1. Тренер: Ирина Дибирова.
Седмерци: 5/6. Исклучувања: 10 минути.
Ференцварош: Сикора (9 одбрани), Биро, Шацл 1, Сучански, Секереш, Месарош, Ван дер Хејден 2, Мартон 2, Лукаш, Снелдер 6, Пења 6, Хафра, Фалувеги 7, Јовановиќ 4, Ковачич 3, Хорњак. Тренер: Габор Елек.
Седмерци: 1/2. Исклучувања: 8 минути.