Металург го претрпе четвртиот пораз во групата Ц во ракометната Лига на шампиони во оваа сезона, прва на домашен терен. Монпелје, во период од две ипол недели, по вторпат славеше над македонскиот вицепрвак, овојпат со 30:24 за преземање на лидерската позиција на табелата од Ла Риоха, но и со меч повеќе од шпанскиот состав. Обрадовиќ кај домашните и Гребие кај гостите постигнаа по 10 гола како најефикасни поединци на средбата.
Монпелје заслужено ги однесе бодовите од Скопје. Французите беа подобри во едночасовното одмерување на силите со тимот од Автокоманда во ВИП арена „Борис Трајковски“. Го имаа Гребие на чија „десетка“ се надоврзаа и Доленец и Фабрегас со исто толку заедно, имаа и подолга клупа што овозможуваше повеќе ротации и рамномерно распоредување на силите.
На спротивната страна ниту Обрадовиќ имаше расположен соиграч да го следи ниту Червар да посегне по решение од клупата за адекватен одговор. Деби, конечно, дочека Илиќ како и најновиот член на клубот, Гуглета. Во финишот Металург се обиде да внесе неизвесност, се доближи на два гола разлика (22:24) на што Монпелје го возврати со серија од 3:0 за безбедно приведување на натпреварот до крај.
Забелешки за составот на Лино Червар, сепак, нема. И покрај младоста се обидуваше да држи чекор со фаворизираниот. Не успеа да изненади, но акумулира нова, неопходна, доза на искуство што ќе биде потребна за дуелите што преостануваат до крајот на групната фаза и, пред се, драгоцена за наредната сезона. Металург во наредното коло ќе гостува во Норвешка кај екипата на Елверум над која триумфира во првото коло со 18:17.
Гостите триумфираа и во вториот денешен меч во групата. Татран Прешов ја совлада екипата на Чеховски Медведи со 29:28.
Металург – Монпелје 24:30 (10:14)
ВИП арена „Борис Трајковски“. Гледачи: 2.000. Судии: Бартош Лешчински (Полска) и Марсин Пихота (Полска)
Металург: Арсиќ, Томовски, Дрогришки 1, Костески 1, Обрадовиќ 10, Кузмановски 3, Илиќ 4, Печенковски /, Крстевски /, Талески /, Велковски /, Брајовиќ /, Пешевски 3, Палевски 2, Гуглета /, Арсеновски /. Тренер: Лино Червар.
Седмерци: 2/2. Исклучувања: 6 минути.
Монпелје: Жерар 1, Белахсен, Портнер, Анкетил /, Симоне 1, Сосе /, Трухановичиус 1, Туми 2, Гребие 10, Доленец 6, Звижеј 1, Кавтичник 1, Фостин /, Фабрегас 4, Порте 2, Бинго 1. Тренер: Ерик Мате.
Седмерци: 6/7. Исклучувања: 8 минути.