Трета победа на Металург, прва на гости, во Лигата на шампиони во оваа сезона. Македонскиот вицепрвак ја забележа на теренот на Елверум со 31:26 во рамки на седмото коло во групата Ц и го препушти „фенерот“ на норвешкиот претставник против кого славеше и во Скопје во првото коло со 18:17. Следен предизвик за тимот од Автокоманда е Татран Прешов во Скопје наредниот викенд.
Металурзи отворија според договорот, со цврста одбрана што противникот ја пробиваше цели осум минути. Во меѓувреме составот на Червар постигна три гола и сето тоа како најава дека е решен да стави крај на мини серијата од два пораза против Монпелје. Норвежаните се обидоа да возвратат, ја забрзаа играта, но таквата нивна определба одеше во корист на „сино-белите“. На голот го имаа и Арсиќ кој одлично се вклопи во доброто дефанзивно издание и на одмор се повекоа со одлични пет гола разлика (14:9).
Елверум го задржа брзиот ритам на игра и во продолжението со таа разлика што за нијанса беше поагресивен во одбрана и порешителен во напад. Постигна и неколку лесни голови и се доближи до два негатива, но повеќе од тоа Металург не дозволи. Во финишот дојде до израз Кузмановски во напад и Арсиќ меѓу стативите за конечни 31:26. Токму Кузмановски беше прв стрелец на натпреварот со девет погодоци, најефикасен во поразената екипа беше Поклар со 7.