Вардар носи плус два од Германија по првиот четвртфинален меч во Лигата на шампиони. Совладан е Фленсбург во неговата „Фленс арена“ со 26:24 што е фантастична основа за надеж дека Фајналфорот е, конечно, на дофат по трите неуспешни мисии во минатото. Јакобсен беше прв стрелец во натпреварот со шест погодоци, по пет за „црвено-црните“ реализираа Душебаев и Циндриќ кој заврши одлична работа во офанзива во отсуство на Игор Карачиќ. Попладне на ниво имаше и Штербик кој одбрани 16 удари.
Одлично прво полувреме имаа вардарци во „Фленс арена“. Го одиграа, можеби, најдоброто во целата сезона кога најмногу требаше. Функционираа како што посакуваа од сите позиции. Заканите кон Андерсон одеа по двете страни и од пикерската позиција, а Арпад Штербик, со осумте интервенции за 30 минути, беше пречка за фрустрации кај германските ракометари. Потврда за цврстата игра во одбрана беа, само, деветте примени гола и 15 постигнати што ја отсликуваат извонредната реализација во напад.
Второто полувреме донесе менување на сликата на теренот и резултатскиот тек на семафорот. Фленсбург ја подигна играта, кај Вардар дојде до опаѓање во одбрана, пред се, што како последица донесе до полесно градење на позиции за шутеви на противничките ракометари. Предноста на македонскиот шампион се стопи до два разлика, но и остана по последниот звук на сирената. Резултатот е одличен. Да се победи бундеслигаш на негов терен, па уште и во нокаут фаза, не е мала работа. Меѓутоа не смее да се заборави дека, сепак, е бундеслигаш кој има капацитет да одигра подеднакво добро и дома и во гости.
Реваншот во Скопје во четврток (19 ч.) ќе почне со два гола предност за Вардар на хартија. Во мислите треба да почне како да е 0:0, да се одигра фокусирано, борбено и ефикасно како што беше случај во првото полувреме денеска, да се намалат техничките грешки и со поддршка од трибините да се премости последната пречка до Фајналфор турнирот во Келн.
Фленсбург – Вардар 24:26 (9:15)
Сала: „Фленс арена“ во Фленсбург. Гледачи: 5.500. Судии: Ненад Крстич и Петер Љубич (Словенија).
Фленсбург: Андерсон, Мелер (5 одбрани), Карлсон, Магнусен 1, Гландорф 2, Могенсен 2, Сван 1, Ване 3, Ѓорѓиќ, Јакобсен 6, Хајнл, Тофт Хансен, Готфридсон, Шмит 4, Мае 3, Радивоевиќ 2. Тренер: Љубомир Врањеш.
Седмерци: 2/3. Исклучувања: 8 минути. Технички грешки: 15.
Вардар: Штербик (16 одбрани), Милиќ, Стоилов, Фереира Мораес 2, Македа 1, Деревен, Карачиќ, Душебаев 5, Абутовиќ, Канелјас 1, Циндриќ 5, Чупиќ 4, Дибиров 4, Шишкарев, Борозан 3, Марсениќ 1. Тренер: Раул Гонзалез.
Седмерци: 2/2. Исклучувања: 12 минути. Технички грешки: 17.
Лига на шампиони
Четврт-финале, први натпревари
Фленсбург – Вардар 24:26
Веспрем – Монпелје 26:23
Утре играат
ПИК Сегед – ПСЖ (17 ч.)
Кил – Барселона (17.30 ч.)