Начинот неубедлив, но најважно е целта исполнета. ЖРК Вардар по четврти пат ќе игра на Фајналфор турнирот во ракометната Лига на шампиони. На двата гола од првиот меч во Икаст (28:26), „црвено-црните“ додадоа уште два во реваншот и со вкупно 54:50 се потврдија во големата четворка. Попладнево во СЦ „Јане Сандански“ славеа со 26:24 во меч со многу грешки на што, за нивна среќа, им беше возвратено со реципроцитет.
Митјиланд согласно очекувањата во Скопје. Данскиот состав немаше што да загуби, играше растоварено и таквиот пристап ги држеше во игра во најголем дел од средбата. Одржуваше резултатски чекор, првото полувреме го реши во своја корист со 11:12, во второто отвори силно, се одлепи на плус три (12:15) и во ситуација со ракометарка помалку на теренот, а имаше контра и за 12:16. Но, приликата отиде во неврат, па казни Мавсар на спротивната страна за 13:15. Кон на словенечката репрезентативка со реализации се надоврза и македонската, Сара Ристовска за набрзина резултатот да биде израмнет.
Потоа преземаа Пенезиќ, Човиќ и Лекиќ за предност на вардарки кои од тој момент до крај не дозволија да влезат во нов минус. Репрезентативките на Хрватска постигнаа по шест гола и беа најефикасни во „црвено-црните“ редови, српската, пак, учествуваше во четири погодоци во новиот триумф над Митјиланд. Шест гола за гостинката екипа реализира Јоргенсен.
Пласман на завршниот турнир во Будимпешта, покрај ЖРК Вардар, обезбедија и Будуќност, ЧСМ Букурешт и Ѓер. Ждрепката за полуфиналните двојки е закажана во вторник.
ЖРК Вардар – Митјиланд 26:24 (11:12)
СЦ „Јане Сандански“ во Скопје. Гледачи: 3.000. Судии: Борис Мандак и Марио Рудински од Словачка.
ЖРК Вардар: Лејно, Суслина, Песоа, Радичевиќ 2, Кликовац, Херем, Мавсар 2, Дамњановиќ, Лазовиќ 1, Алтхаус 1, Пенезиќ 6, Човиќ 6, Лакрабер 2, Хмирова, Лекиќ 4, Ристовска 2. Тренер: Ирина Дибирова.
Седмерци: 2/2. Исклучувања: 2 минути. Технички грешки: 17.
Митјиланд: Торн, Енглерт, Елебек, Јоргенсен 6, Блом 2, Петерсен, Јакобсен, Кристијансен 5, Фрис, Линден, Педерсен 5, Аугустесен, Јенсен 3, Јонсдотир, Бургард 3. Тренер: Кристијан Кристенсен.
Седмерци: 4/4. Исклучувања: 4 минути. Технички грешки: 15.
Лига на шампиони
Четврт-финале, реванш средби
ЖРК Вардар – Митјиланд 26:24 (прв меч 28:26)
Ференцварош – ЧСМ Букурешт 26:27 (25:30)
Ларвик – Будуќност 30:35 (17:31)
Ѓер – Мец 28:22 (31:32)