Вардар го доживеа првиот пораз во сезоната од Мешков Брест кога најмалку требаше. Белорускиот првак го победи македонскиот со 30:26 (полувреме 15:13) во претпоследното коло од групната фаза во Лигата на шампиони. „Црвено-црните“ и покрај поразот остануваат лидери во Б конкуренцијата со бод предност пред Рајн Некар Левен и доколку во последното коло го совладаат Кристијанштад на домашен терен ќе обезбедат директно место меѓу осумте најдобри.
Освен во воведната третина на мечот, период во кој „црвено-црните“ беа во водство, а Штербик добар меѓу стативите, главниот збор во останатите 40-тина минути го имаа домашните играчи. Во последните десетина минути од првиот дел ја презедоа контролата врз семафорот и докрај не ја испуштија на што, во прилог, им беше и расположениот голман.
Во мозаикот на Мешков Брест се поклопија многу работи што максимално беа искористени. Од изданието на голманот Пешиќ, преку играта во одбрана, реализацијата, па ако сакате и противникот. Вардарци можеби ја потценија ситуацијата понесени од триумфот на Целје и фаворитската улога што ја носеа и како лидери во групата, но и од позитивниот биланс во меѓусебните средби.
Кристопанс, кој од наредната сезона ќе игра во дресот на Вардар, и Остроушко постигнаа по осум гола и беа најефикасни на натпреварот, Чупиќ и Карачиќ реализизираа по пет за тимот на Раул Гонзалез кој ја пропушти првата меч топка за врвот на табелата. Останува поправниот испит пред своја публика во недела во СЦ „Јане Сандански“ против шведскиот состав кој денеска, на домашен терен, приреди изненадување против европскиот првак Кјелце (29:25).
Мешков Брест – Вардар 30:26 (15:13)
Спортски комплекс „Викторија“ во Брест. Гледачи: 3.500. Судии: Ненад Николиќ и Душан Стојковиќ од Србија.
Мешков Брест: Пешиќ, Чарапенка, Мијатовиќ, Рутенка 3, Јашчанка 3, Бабичев, Кулак 7, Кристопанс 8, Јурњок, Стојковиќ 1, Шумак, Вукиќ, Продановиќ, Разгор, Остроушко 8, Шилович. Тренер: Сергиј Бебешко.
Седмерци: /. Исклучувања: 6 минути. Технички грешки: 10.
Вардар: Штербик, Ангелов, Стоилов, Недановски, Македа 1, Деревен, Карачиќ 5, Душебаев 3, Абутовиќ, Кањалјас 1, Циндриќ 2, Чупиќ 5, Дибиров 4, Шишкарев 2, Борозан 1, Марсениќ 2. Тренер: Раул Гонзалез
Седмерци: 3/3. Исклучувања: 4 минути. Технички грешки: 9.
Лига на шампиони
Група А, 13. коло
Фленсбург – Силкеборг 26:24
Шафхаузен – Веспрем 27:28
Висла Плоцк – ПСЖ (недела, 18 ч.)
Кил – Барселона (недела, 19.45 ч.)
Група Б, 13 коло
Мешков Брест – Вардар 30:26
ПИК Сегед – ППД Загреб 26:21
Кристијанштад – Кјелце 29:25
Целје – Рајн Некар Левен 37:31
Табела: Вардар 18, Рајн Некар Левен 17, Кјелце 16, ПИК Сегед 15, Мешков Брест 14, Целје 9, Кристијанштад 8, ППД Загреб 7.