Вардар ја нанижа и третата победа во групата Б во рамки на машката ракометна Лига на шампиони. Попладнево во Скопје „падна“ Целје со 35:30 за останување на „црвено-црните“ на првата позиција на табелата што носи директен пласман во четврт-финале. Нејзината заверка ќе следува во преостанатите два меча – најпрво на гостувањето во Белорусија кај Мешков Брест (4 март) и во последното коло против Кристијанштад во СЦ „Јане Сандански“ (12 март).
Вардарци во ниту еден момент не дозволија неизвеност пред своите гледачи против словенечкиот ривал со реноме на европски првак од 2004 година. Тргнаа сигурно и со намера да ја одржат победничката атмосфера во текот на сите 60 минути. Во тоа и успеаја за, на крајот, вкупно 40 триумф во ЛШ, деветти во оваа сезона во елитното натпреварување и четврти против Целје вклучувајќи ги и двата во СЕХА лигата.
Најефикасни на средбата беа Душебаев и Млакар кои постигнаа по осум гола. Шпанецот меѓу „црвено-црните“ имаше поддршка во нападот од Русите Дибиров и Шишкарев кои реализираа по шест погодоци. Хрватскиот репрезентативец Игор Карачиќ даде пет, а ново добро издание на голот имаше Арпад Штербик.
Вардар – Целје 35:30 (20:15)
СЦ „Јане Сандански“ во Скопје: 4.000. Судии: Зигмарс Сондорс и Ренарс Личис од Летонија.
Вардар: Штербик, Ангелов, Стоилов, Фереира Мораеш 3, Македа, Деревен 1, Карачиќ 5, Душебаев 8, Абутовиќ, Канелјас 1, Циндриќ, Чупиќ 2, Дибиров 6, Шишкарев 6, Борозан, Марсениќ 3. Тренер: Раул Гонзалез.
Седмерци: 2/2. Исклучувања: 6 минути. Технички грешки: 8.
Целје: Лесјак, Гаиќ, Малус 2, Бабарскас, Јанц 4, Разгор 3, Сухолезник, Маргуч, Гросељ 1, Потеко 1, Зарабец 2, Кодрин 1, Мацковшек 3, Млакар 8, Звижеј 1, Беќири 4. Тренер: Бранко Тамсе.
Седмерци: 2/3. Исклучувања: 6 минути. Технички грешки: 13.
Лига на шампиони, 12 коло
Група А
Веспрем – Висла Плоцк 31:25
Кил – Силкеборг 21:24
ПСЖ – Шафхаузен (сабота, 20 ч.)
Барселона – Фленсбург (недела, 19.30 ч.)
Група Б
Вардар – Целје 35:30
Рајн Некар Левен – Мешков Брест 25:24
ППД Загреб – Кристијанштад (сабота, 20 ч.)
Клејце – ПИК Сегед (недела, 18 ч.)