Живко Мукаетов останува на чело на македонскиот ракомет и во наредните четири години. Досегашниот прв човек на Ракометната федерација на Македонија (РФМ) доби нов мандат по едногласната поддршка од 37 присутни делегати, од вкупно 40, на изборното Собрание што се одржа попладнево во Скопје.
Веднаш по реизборот на Мукаетов беше предложен и прифатен новиот состав на Управниот одбор (УО) на РФМ. Член во него, во наредниот период, ќе биде и поранешниот македонски репрезентативец, Наумче Мојсовски.
„Благодарност до сите за укажаната поддршка. Кога првпат дојдов на оваа функција ветив обид за поинакво функционирање на федерацијата од дотогашното. Остваривме голем дел од предизвиците во изминатиот период. Заедно се радувавме на победи, тагувавме по порази. Внесовме многу енергија, напори и ресурси во работата со младите категории кои треба да бидат основа на идните репрезентативни генерации. Остануваме на истиот курс, остануваме фокусирани за континуирани учества на големите турнири“, рече Мукаетов пред делегатите.