Македонската машка ракометна репрезентација ја забележа втората победа во квалификациите за Европското пренство во Хрватска во 2018 година. Во преполниот СЦ „Борис Трајковски“ е совладан Исланд со 30:25 (полувреме: 15:13) во дебито на Раул Гонзалез на клупата на „црвено-жолтите“. Кире Лазаров уште еднаш ја демонстрира својата класа. Капитенот беше нерешлива загатка за Исланѓаните чија мрежа ја тресеше дури 11 пати. Пет гола постигна Талески, по четири додадоа Миркуловски и Стоилов. Сигурдсон беше најефикасен во поразената селекција со шест погодоци.
Македонија не дозволи луксуз на домашен терен и ја оправда улогата на благ фаворит во скопските 60 минути од двомечот со Исланд. Во своја корист ги реши двата дела за впишување на нови два бода на контото пред гостувањето во недела во Рејкјавик. Одличен на голот беше и Борко Ристовски за кого ова беше прв настап во националниот тим по пропуштеното Светското првенство во Франција.
Освен водството во воведните минути од натпреварот, Исланд падна во подредена улога до крајот на средбата и постојано беше во негатива. „Црвено-црните“ умешно ја одржуваа предноста и го држеа противникот на безбедно резултатско растојание. Гостите успеаја да се заканат во финишот на натпреварот, се доближија на еден гол (26:25), за повеќе немаа сили. Македонија додаде гас и во последните три-четири минути го зададе решавачкиот удар благодарение на играта во одбрана, интервенциите на Ристовски и мирната рака во завршницата на нападите.
Македонија – Исланд 30:25 (15:13)
Сала: СЦ „Борис Трајковски“. Гледачи: 5.500. Судии: Ларс Гепел и Маркус Хелбиг (двајцата од Германија).
Македонија: Митревски, Ристовски, Манасков, Стоилов 4, К. Лазаров 11, Митков, Талески 5, Миркуловски 4, В. Маркоски, Н. Маркоски, Георгиевски 3, Ф. Лазаров, Ојлески, Кузмановски 2, Нелоски, Пешевски 1. Селектор: Раул Гонзалез.
Седмерец: 5/5. Исклучувања: 4 минути. Технички грешки: 10.
Исланд: Густавсон 1, Нилсен, Кристјансон 1, Палмарсон 4, Карасон 3, Халгримсон, Атласон, Сигурдсон 6, Гудмундсон 2, А. Гунарсон 1, Арнарсон 1, Елисон, Б. Гунарсон, Јонсон, Магнусон 3, Смарасон 3. Селектор: Геир Свеинсон.
Седмерец: 4/6. Исклучувања: 8 минути. Технички грешки: 9.
Квалификации за ЕП 2018
Група 4, трето коло
Македонија – Исланд 30:25
Украина – Чешка 26:23.
Табела: Македонија 4, Украина 4, Чешка 2, Исланд
Идно коло: Чешка – Украина (сабота), Исланд – Македонија (недела)