Вардар како казнена експедиција во СЕХА лигата. Европскиот шампион ја забележа и третата победа во новата сезона во регионалното натпреварување. Во „црвено-црната“ машинерија на Раул Гонзалез овојпат влезе Мешков Брест кој загуби во СЦ „Јане Сандански“ со 31:23 (полувреме 17:14).
Победникот во дербито на хартија го реши играта во одбрана на домашните како во ситуации шест на шест така и во белоруските обиди да пробијат со ракометар повеќе во напад во второто полувреме и да одржат резултатска тензија во мечот. Но, наместо тоа, вардарци организирано и дисциплинирано се бранеа, трпеливо чекаа на грешка на гостите и без проблем ја тресеа празната мрежа. Па, разликата од три гола на големиот одмор достигна плус девет за македонскиот првак (29:20) на прагот на завршните десет минути што рутински беа одработени.
Вуко Борозан беше најефикасен во тимот на Вардар со шест гола, Иван Чупиќ додаде пет, а Арпад Штербик забележа осум интервенции. На спротивната страна по пет реализации забележаа Стојковиќ и Шилович, Раде Мијатовиќ одбрани 10 удари.
Пред Мешков Брест, „црвено-црните“ ги совладаа Металург со 32:23 во првото коло и Горење Велење со 32:19 во второто. Нареден ривал на вардарци во СЕХА лигата е словачки Татран Прешов во Скопје на 19 септември.