Вардар ја продолжи доминацијата во ракометниот Куп на Македонија за мажи. „Црвено-црните“ ја освоија четвртата титула во низа, 12 севкупно во натпреварувањето, по победата над Еурофарм Работник со 31:26 (полувреме 16:13) во финалето на завршниот турнир во Битола.
Мечот за трофејот беше во резултатски егал (7:7) до средината на првото полувреме. Вардарци во продолжение стиснаа гас и со серија од 3:0 поведоа со 10:7 за накратко потоа да имаат и највисоки пет гола предност (13:8) до десетминутната пауза меѓу двата дела.
Вторите 30 минути минаа во знакот на Вардар чии ракометари рутински го одржуваа водството што во еден момент нарасна и на осум гола (27:19). До крајот битолчани успеаја само да го ублажат поразот од тимот што важеше за апсолутен фаворит и кој на почетокот на јуни го очекува настап и на Фајналфор турнирот во Лигата на шампиони во Келн.
Иван Чупиќ со осум гола беше најефикасен вардаров играч во финалето, по пет постигнаа Лука Циндриќ и Алекс Душебаев, по четири во победата вградија Игор Карачиќ и Александар Деревен, а Страхиња Милиќ забележа 13 одбрани. Прв стрелец кај Еурофарм Работник беше Филип Чурлевски со седум погодоци.
Признанието за најкорисен играч на завршниот турнир во Купот на Македонија заврши кај хрватскиот репрезентативец Лука Циндриќ. Две индивидуални награди и покрај поразот, сепак, останаа во Битола. Градимир Чаневски беше прогласен за најдобар голман, а Филип Чурлевски за најдобар стрелец.