Обвинителството презентираше пораки за кои сеуште нема правосилна одлука дали воопшто треба да се презентираат, реагира адвокатката Сузана Јошевска, бранител во судскиот предмет „Софтвери“ во кој се обвинети шестмина меѓу кои и поранешниот генерален секретар Драги Рашковски. Јошевска забележа дека и не било јасно на кој начин се обезбедени пораките што обвинителството ги презентираше како докази, ниту меѓу кого е водена комуникацијата.
Според Јошевска пред секоја порака обвинителката испуштила да каже дека стои зборчето unknown, што пак според обвинетиот Рашковски е доказ дека не станува збор за Вибер комуникација, туку за некој друг запис за што одбраната ќе докаже во текот на судскиот процес.
– Обвинителката не е форензичар, немаме дигитални докази, направена ми е суштествена повреда, се читаат пораки за што се уште нема правосилна пресуда, рече Рашковски додавајќи дека ако сака судијката може да го саботира, како што рече, но дека морал да објасни дека денеска не биле презентирани докази.
Обвинителката Трајчева денеска како материјални докази читаше пораки од Вибер комуникација на обвинетите, а попладнево и пораки од whats up. Судењето продолжува утре во 10 часот.