Дополнителениот заменик министер за внатрешни работи Оливер Андонов денеска одржал прес конференција само за одредени медиуми на која информирал дека министерот Оливер Спасовски му забранува секаков јавен настап и обраќање без претходна согласност на неговиот кабинет.

Делови од прес конференцијата на Андонов ви пренесуваме од провладините телевизии и портали кои биле присутни таму.

„Колку и да звучи смешно, ова пред се претставува навреда лична, на мојот личен дигнитет, навреда кон граѓаните на Република Македонија кон нивното право да бидат информирани, да ги слушнат сите страни, навреда кон демократијата бидејќи се работи за обид за воведување цензура“, изјавил Андонов на прес конференцијата одржана во МВР.

Тој додава дека МВР не е политичка испостава на СДСМ, туку е Министерство во функција на граѓаните на Република Македонија и составен дел од Владата.

„Ова е настан без преседан во работењето на МВР, обид да се изурпира моето законско право за јавно информирање на граѓаните за сите сегменти од мојата работа, која пред се е јавна“, рекол Андонов.

По оваа прес конференција, попладнево од МВР пристигна реакција, во која се вели дека одлуката на министерот Спасовски за јавните настапи на Андонов е донесена со цел да се спречи двојно командување на оваа институција, потсетувајќи дека дополнителниот заменик министер има ингеренциите само за прашања на изборите.

Соопштението од МВР ви го пренесуваме во целост.

„Министерството за внатрешни  работи е државен орган кој има правила на функционирање кои важат со години и дополнителниот заменик  министер г-дин Андонов требало да се информира барем за овие елементарни работи.

Целосна невистина е дека на Секторот за односи со јавност му е забрането да му дава логистичка поддршка на дополнителниот заменик на министерот.

Комуникацијата на МВР со јавноста се врши исклучиво согласно одредбите на Законот за внатрешни работи, Законот за полиција и Упатството за начинот на остварување комуникација со јавноста кое е потпишано од поранешната министерка Гордана Јанкулоска, а изготвено во јули 2007 година.

Според законската регулатива дополнителниот заменик  министер Оливер Андонов има ингеренции само за прашања во врска со изборите. Во МВР не може да биде дозволена двојна команда без оглед на нечии желби и амбиции.  Во МВР мора да се почитува законот“, пишува во дописот од МВР.