Илија Димовски од ВМРО-ДПМНЕ, пред почетокот на денешната собраниска седница, од говорницата му порача на претседателот на Собранието, Талат Џафери дека Законот за јазиците се носел противуставно.
Уште пред да ја најави точката на дневен ред, Димовски од говорница рече дека му е „жал што спикерот избрал да се дебатира за законот, на денот кога УЧК почнале да пукаат во Тетово“.
„Според член 173 од Деловникот, став 3, по повторно разгледување на Законот, амандмани можат да се поднесуваат само со укажување на Претседателот на Републиката. Тој посочи дека законот е неуставен во 19 членови и пратениците на ВМРО-ДПМНЕ поднесоа амандмани токму за тие членови. Кои беа другите прекршувања? Неправилно беше употребено европското знаменце, Владата направи прекршување но и Собранието бидејќи не и го врати законот на Владата. Баравме јавна дебата, СДСМ се крстеа во Господ, ветуваа, но дебата немаше. Деловникот го прекрши и Артан Груби кој на Комисијата за европски прашања, три дена расправаше за еден амандман, а ниту еден од поднесените на ВМРО-ДПМНЕ“, набројуваше Димовски.
Димовски воедно му порача на Џафери дека седејќи на спикерското столче, негова обврска е да се грижи Собранието да работи по Деловник.
„Доколку ве интересираат само интересите на ДУИ, вие треба да си ја продолжите постапката и да го прекршите Уставот“, рече Димовски.
По ова, Димовски не се оддели од говорницата, додека Џафери неколку пати потенцираше дека не е започната седницата за јазиците.
И покрај негодувањата на пратениците од ВМРО-ДПМНЕ, Џафери продолжи со гласање на измени на други два закона, по што даде еден час пауза.
Пред почетокот на седницата, претседателот на ВМРО-ДПМНЕ, Христијан Мицкоски во објава на социјалната мрежа Фејсбук, напиша дела тој денеска во Собранието бил на координација со пратениците од неговата партија, а со Џафери и Заев не разговарал за Законот.
„Околу шпекулациите кои произлегоа, немав никаква средба ниту со Талат Џафери, ниту пак со Зоран Заев. Единствено бев Собранието на координација со пратеничката група на ВМРО-ДПМНЕ. Денес власта и парламентарното мнозинство прават атак врз демократијата, ја поништуваат волјата на граѓаните. Парламентарното мнозинство во Собранието спрема настан кој не ја почитува волјата на огромен број македонски граѓани, го крши Уставот, Деловникот, а ова е директен удар на соживотот во Македонија, од кој ниту Албанците, ниту Македонците нема да имаат подобар живот. Само две партии што се договориле врз грбот на етничките заедници мислат дека имаат ќар. Но, државата и граѓаните не“, напиша Мицкоски.