Расте бројот на жртви во катастрофалните поплави во Западна Германија и Белгија. Повеќе од 160 лица загинаа а над 1 300 уште се водат за исчезнати.
Според денешната статистика само во Германија досега има најмалку 135 жртви но локалните власти стравуваат дека бројката допрва ќе расте.
Германскиот претседател Штајнмаер изјави дека е „вџашен“ од пустошот предизвикан од поплавите и вети помош за семејствата на жртвите и градовите кои претрпеа катастрофа. Утрово, нивото на водата стагнира, но ситуацијата и натаму е напната.
Во Белгија пак поплавите однесоа најмалку 23 животи, а во Холандија премиерот Марк Руте прогласи национална катастрофа во јужната покраина Лимбург.
Полицијата во западногерманската покраина Рајнска област-Пфалц утрово соопшти дека веќе има 90 загинати – 27 повеќе од вчера. Стотици луѓе во регионот се исчезнати,и според дел германски медиуми, таму може да има околу 600 жртви.
Претседателот Франк-Валтер Штајнмаер денеска ќе ги посети погодените области. Најмалку 25 лица загинаа во поплавите во Белгија, според последните податоци.
Покрај Западна Германија и Белгија, од тешки поплави предизвикани од поројните дождови беа погодени и јужна Холандија, североисточна Франција, Луксембург и Швајцарија. На многу места, реките се излеаја од своите корита.