Се разделуваат патиштата на Челзи и на Џон Тери (36) на крајот на сезоната. По 22 годишна соработка, долгогодишниот капитен ќе замине од „Стемфорд бриџ“ со четири освоени титули во Премиерлигата, пет во ФА купот и по една во Лигата на шампиони и во Лига Европа.
„Чувствувам дека сè уште можам да придонесам на терен, но разбирам дека шансите да играм во Лондон се ограничени“, порача Тери, откако премиерлигашот ја објави веста за разделба.
Столбот на одбраната дебитира за „сините“ во 1998 година. Оттогаш забележа 713 настапи што ги зачини со 66 гола. Оваа сезона стартуваше само четирипати за тимот на Антонио Конте, но ќе остане забележан како клупски рекордер по бројот на одиграни мечеви (575) со капитенската лента на рака.