Премиерата на филмот во Јапонија, повеќе од осум месеци откако беше отворен во САД и Европа, се гледаше со трепет поради чувствителноста на темата.
Режисерот на Опенхајмер, Кристофер Нолан и Ема Томас треба да бидат наградени со „Витез и Дама“. Во меѓувреме оскаровецот конечно имаше премиера во Јапонија каде што беше дочекан со различни реакции.
Британскиот режисер Кристофер Нолан, кој овој месец доби Оскар за најдобра режија за филмот Опенхајмер, ќе добие „Витез“. Неговата сопруга, филмската продуцентка Ема Томас, треба да добие „Дама“.
Владата на Обединетото Кралство соопшти дека на двајцата им се оддава почест за нивните зауслуги за филм.
Филмот за таткото на атомската бомба ја преплави церемонијата во 2024 година, земајќи вкупно седум награди – вклучувајќи и за најдобриот филм.
Нолан претходно беше номиниран за пет награди Оскар пред „Опенхајмер“, но никогаш не доби Оскар до церемонијата оваа година.
Веста за нивните почести беше изненадување, бидејќи тие обично се доделуваат двапати во годината, еднаш за нова година, а потоа на роденденот на кралот Чарлс III (14 ноември), кој ги доделува почестите.
Сепак, тие понекогаш се доделуваат по посебни достигнувања, често поврзани со спортот и уметноста – и Нолан повеќе од се квалификуваше на тој фронт со оглед на неговите награди за Опенхајмер.
Почестите формално се доделуваат на церемонија во Бакингемската палата, честопати лично од монархот на ОК. Сепак, кралот моментално не презема никакви кралски должности, бидејќи се наоѓа на лекување од рак.
Роден во 1970 година во Лондон од татко Британец и мајка Американка, Нолан студирал на Универзитетскиот колеџ во Лондон, избирајќи го UCL поради неговите капацитети за снимање филмови. Таму ја запознал својата идна сопруга во 1997 година. Тие имаат четири деца заедно и живеат во Лос Анџелес.
Нолан (53) и Томас (52) ја коосноваа продуцентската куќа „Синкопи“, која стои зад многу нивни блокбастери. Тие соработуваа на сите негови главни играни филмови, вклучувајќи ја трилогијата „Темниот витез“, „Inception“ од 2010 година, „Интерстелар“ од 2014 година, „Данкерк“ од 2017 година и „Тенет“ од 2020 година.
Кога на Нолан му беше доделена највисоката чест на Британскиот филмски институт, стипендијата BFI, бидејќи е „еден од најиновативните и највлијателните светски филмски режисери“, тој и оддаде почит на својата сопруга.
„Ме прашаа дали во сите тие години кога се боревте да снимате филм, дали некогаш сте се чувствувале сами кога го правите тоа?“, рече тој. „Можев да кажам дека не, бидејќи мојата продуцентка Ема Томас секогаш ги гледаше работите на ист начин како што јас гледав во однос на важноста на медиумот“.
На друго место, Опенхајмер конечно имаше премиера во Јапонија, каде што два града беа избришани пред 79 години од нуклеарното оружје измислено од американскиот научник.
Опенхајмер директно не прикажува што се случило на теренот кога бомбите биле фрлени врз Хирошима и Нагасаки; наместо тоа се фокусира на Опенхајмер како личност и неговите внатрешни конфликти.
Премиерата на филмот во Јапонија, повеќе од осум месеци откако беше отворен во САД и Европа, се гледаше со трепет поради чувствителноста на темата.
Поранешниот градоначалник на Хирошима Такаши Хираока, кој зборуваше на настанот за преглед на филмот во југозападниот град, беше покритичен за она што беше испуштено.
„Од гледна точка на Хирошима, ужасот на нуклеарното оружје не беше доволно прикажан“, рече тој, цитиран од јапонските медиуми. „Филмот е направен на начин да го потврди заклучокот дека атомската бомба била искористена за да се спасат животите на Американците“.
Реакцијата се разгоре минатата година поради маркетинг феноменот „Барбенхајмер“ кој ја спои розовата и забавната Барбика со интензивниот Опенхајмер.
Извор: Еуроњус
Подготви: А. В.