Националниот младински совет на Македонија изразува огромна загриженост и најостра осуда на развојот на последните настани по повод изборите за нов Претседател на Студентски парламент при УКИМ.
НМСМ реагира дека и претходно укажуваа дека изборите на СПУКМ се нетранспарентно распишани во многу кус период и време кога голем дел од студентите ги напуштија кампусите.
– Синоќешните случувања исто така беа уште еден показател дека младинското учество, еднаквите можности за сите млади, вредностите на кои се темели младинското здружување како и безбедноста на младите се загрозени и истите мора најостро да се осудат, се вели во соопштението на НМСМ.
НМСМ бара Ректорската управа на УКИМ да се произнесе за транспарентноста и демократичноста на овие избори, да се произнесе за легитимитетот на новоизбраниот Претседател на УКИМ и да преземе одговорност за ограничувањето на младинското учество, необезбедувањето на еднакви можности за сите студенти и да се произнесе по прашањето како во иднина ќе гарантира безбедност за своите студенти.
НМСМ исто така апелира МВР да ги преиспита мерките кои ги употребува за справување со вакви кризни ситуации и околности и повикува на воздржување од насилство и методи на заплашување на младите.
И Средношколскиот Пленум исто така изразува загриженост и револтираност по вчерашните настани, кој велат е, “школски пример“ за изборна кражба, и злоупотреба на Единицата за брзо распоредување (ЕБР) која насилно го расчисти теренот од пред канцеларијата на СПУКМ.
– Ние, како средношколци, и како идни академски граѓани, остануваме доследни на борбата за подобро образование и бараме одговорност за вчерашната папазнанија, каде во најголема мера државните органи се јавуваваат како заштиник на нелегитимни и нелегални избори, а се употреби насилство против оние кои побараа легитимни и легални избори, се вели во нивната реакција.
Младите средношколци од Пленумот за врв на апсурдноста ја сметаат интервенцијата на ЕБР која насилно го расчисти теренот од пред СПУКМ, со што студентите кои се спротиставија на изборната кражба и побараа поништување на студентските избори беа исфрлени од пред канцелариите на СПУКМ, а беа повредени неколку студент(к)и.
– Вчерашните настани ги оценуваме како крајно недемократски и нецивилизациски, пример за неодговорно и противправно дејствување, реагира Пленумот.