Илија Илиоски од Републичкиот штаб за реформи во ВМРО-ДПМНЕ денеска на прес-конференција одговарајќи на новинарски прашања рече дека воопшто не размислуваат да делуваат надвор од партијата, ниту пак да создаваат фракции и паралелни листи за градоначалници и советници за локалните избори. Илиоски рече дека секој нивни чекор ќе биде во рамки на партијата и покрај тоа што имаат различни ставови и размислувања со останатиот дел од членството и со раководството. Како што рече Илиоски според нивните анализи 50 отсто од членството смета дека треба да има реформи во партијата.
Републичкиот штаб за реформи во ВМРО-ДПМНЕ денеска ги повика сите членови и симпатизери на партијата да ја поддржат Декларацијата за реформи и демократизација.
Како што информираше Илиоски, Декларацијата почива на принципите за рамноправност, слобода на говор и мисла, непосреден избор, тајност во одлучувањето, неспоивост на функции, индивидуална одговорност, личен интегритет, квалитет и внатрепартиска солидарност.
„Сметаме дека овие се принципите кон кои треба да тежнееме во целост и да ги оствариме во рамки на делувањето на нашата партија. Сега е моментот да се обединеме, да и помогнеме на ВМРО-ДПМНЕ, да го вратиме победничкиот дух, правото на членовите непосредно да ги донесуваат одлуките, да го реформираме работењето и делувањето за да однесеме убедлива победа на следните избори“, нагласи Илиоски.
Декларацијата за реформи и демократизација на 29 јули годинава била доставена до Централниот комитет на ВМРО-ДПМНЕ, но РШ досега нема добиено никаков одговор. Како што рече Илиоски, и Центарот за комуникации на партијата не одговара на нивните предлози, сугестии и барања, вклучувајќи ја и денешната покана на лидерот Никола Груевски да присуствува на прес-конференцијата.