Иницијаторите за реформи во ВМРО-ДПМНЕ на прес-конференција денеска побараа одговорност за изборниот пораз од лидерот Никола Груевски и луѓето околу него и побара во партијата да се организира управувачки комитет, кој ќе го организира следниот конгрес на партијата, а на кој би се изгласал нов подемократски статут на ВМРО-ДПМНЕ.
Како што рече Петар Богојески од „реформаторите“, Груевски треба да ја прифати одговорноста и за потрошеното време во партијата кое било посветено на притисоци, етикетирања и на нови поделби.
„На лидер на ВМРО-ДПМНЕ му доликува да ја преземе одговорноста. Господине Груевски, бидете маж и преземете ја одговорноста, бараме веднаш да поднесете неотповиклива оставка од функцијата претседател на ВМРО-ДПМНЕ“, рече Богојески.
Тие сметаат дека единственото решение за враќање на довербата на граѓаните е преку здрава и демократска дискусија во партијата да се пронајдат причините за тоа и партијата да излезе подобра од целиот тој процес.
„Ова е време да дејствуваме достоинствено, да се соочиме со реалноста, да преземеме активности и мерки за да ја вратиме довербата на граѓаните“, рече Богојески.
Тој во име на иницијативата побара сите општински и месни комитети на партијата да се отворат за здрава дискусија и веднаш да престанат сите закани за исклучување кон членовите што не се согласуваат со водството.
„Господине Груевски, иднината е во обединување, а не во поделби“ рече Богојески, најавувајќи дека во седиштето на партијата ќе поднесат барање веднаш да почне постапката за формирање на управувачкиот комитет кој би го организирал следниот конгрес.
Доколку не бидат исполнети барањата на реформаторите, како што рече Богојески, тие ќе преземат пожестока акција сè додека партијата не се демократизира.
„Бараме партија каква што ни ја оставија предците, а не заробена партија. Ни треба енергија за нови победи, а не реваншизам и закани“, рече Богојески.
Одговарајќи на новинарско прашање, Богојески рече дека сосема погрешно е да се бараат предвремени парламентарни избори, затоа што, како што покажале резултатите од локалните избори, ВМРО-ДПМНЕ ваква каква што е може да се надева само на пораз.