Олимпијакос е се поизвесно дека од наредната натпреварувачка сезона ќе биде дел од АБА лигата. Според бројни грчки медиуми, претставници на „црвено-белите“ од Пиреја имале позитивни разговори со Црвена Звезда и со Партизан во Белград, со Цедевита и со Цибона во Загреб, а нивна наредна дестинација е Подгорица на средба со актуелниот шампион, Будуќност.
Притоа се наведува дека во плановите на делегацијата на атињаните е посета низ целата поранешна држава и средби со сите клубови за презентација на планот и програма што би биле на сила за време на нивниот кошаркарски престој на Јадранот. Доколку дојде до финална реализација на најавата, тогаш Олимпијакос ќе биде петти клуб надвор од просторите на екс Југославија по Левски Софија (Бугарија), Нимбурк (Чешка), Шолнок (Унгарија) и Макаби Тел Авив (Израел).
Олимпијакос, пишуваат порталите кај јужниот сосед, е подготвен да го прифати условот на АБА лигата според кој треба да се обврзат да партиципираат во регионалното натпреварување најмалку три години. Најголем проблем што се споменува се неименувани тимови за кои проблем се патните трошоци, па затоа од „црвено-белите“ е побарано да го финансираат патувањето на сите екипи во Грција и престојот во земјата.
Но, извори велат дека членството на Олимпијакос во АБА лигата би можело да предизвика проблем и во структурата на натпреварувањето, па најверојатно ќе наложи проширување на лигата од 12 на 14 клуба. Во така ситуација би можела да профитира Олимпија Љубљана која го загуби прволигашкиот статус како последнопласирана во сезоната, но би имала кам-бек на „зелена маса“.
Олимпијакос во целата ситуација планира да заобиколи и правило на грчкиот кошаркарски сојуз според кое клубот го губи статус доколку две години нема екипа во некое од неговите натпреварувања. Решението е во формирање на нова подмладена екипа која ќе учествува во втората лига што ќе остави простор за Пирејците за враќање во националното првенство.