Почнаа градежните работи на објектот Универзална сала во Скопје. Реконструкцијата ќе се одвива во две фази и се очекува да биде завршена до 2026 година кога објектот треба да е подготвен за настани и да ги прими своите посетители. Во текот е првата фаза, односно реконструкција на кровот и на фасадата, а потоа продолжува техничката фаза и ентериер.
Министерката за култура Бисера Костадиновска Стојчевска денеска пред Универзалната сала по повод отпочнување на активностите посочи дека Универзалната сала е архитектонски и културен симбол на Скопје.
-Министерството за култура презеде обврска во наредните три години непречено да го реализира проектот, затоа што има обезбедено финансиски средства и комплетна документација. Универзална сала има емотивна вредност и за скопјани и за публиката. Универзалната сала му недостига на Скопје, им недостига на уметниците и на културните работници, рече Костадиновска Стојчевска.
Според министерката, развојот на културата не може без еден ваков мултифункционален објект. Универзалната сала, како што рече, им припаѓа на уметниците, на културните дејци, а пред се на публиката.
-Затоа, нашата мисија е во наредните три години и овој простор да се уреди, како што му доликува на Скопје. Чест ми е но и голема одговорност целиот процес на реконструкција да се одвива професионално, стручно и посветено онака како што ние настојуваме да ја промовираме културата. Граѓаните не смееме да ги оставиме без својот дом, односно без Универзална сала, додаде Костадиновска Стојчевска.
Проектантот од „Мегарон инженеринг“, Бујар Муча изјави дека проектот е готов во сите свои фази уште од 2021 година, и сега е ставен на располагање на изведувачите.
-Среќата ја има мојот тим, затоа што после две години ќе продолжи да се реализира нешто за што навистина се вложивме и материјално и интелектурално. Најпрвин треба да се заврши она што е започнато, а тоа е првата фаза, односно реконструкцијата на кровот и на фасадата на објектот и потоа стандарната процедура, да се продолжи со она што се технички фази и интериер, рече Муча.
Во однос на сцената и просторот за публиката, Муча посочи дека тој ќе биде комплетно модернизиран, а бројот на седиштата ќе се намали заради новите прописи. Како што информираше, ќе има 300 седишта помалку заради противпожарни но и сите други архитектонски прописи.
-Кога ќе влезете во салата, ќе знаете дека влегувате во комплетно модернизирана Универзална сала, додаде Муча.
Прашан дали има уништување на просторот со оглед на тоа што Универзалната сала со години беше отворена, Муча посочи оти не верува дека има оштетувања кои би можеле да наштетат на она што веќе е изградено.
-Не верувам дека има такви оштетувања кои што би можеле да наштетат на она што е веќе изградено. Веројатно ќе се направи ревизија од стручни тела и тоа ќе се открие. Доколку постои потреба од одредена санација веројатно ќе се направи, но не верувам дека има сериозно оштетување, посочи Муча.
Претседателот на СДСМ Димитар Ковачевски изјави дека со реконструкција на Универзалната сала конечно ќе се врати симболот на модерно Скопје.
-Она што беше почнато како процес пред повеќе месеци кога Градот Скопје одлучи да го предаде објектот на Министерството за култура со цел да се направи комплетна реконструкција, наскоро ќе добие и конкретен епилог. Конечно го враќаме симболот на модерно Скопје, на солидарно Скопје. Генерации скопјани израснале со настаните во Универзална сала и уште генерации и генерации ќе уживаат во годините кои доаѓаат во настаните коишто тука ќе се организираат, рече денеска Ковачевски пред Универзалната сала по повод отпочнување на градежните активности.
Тој потсети дека според договорот, Министерството за култура откако ќе ја финализира градбата ќе го предаде објектот на Град Скопје со целокупната пропратна документација во однос на изведувањето. Потоа, како што рече, сите права и обврски кои произлегуваат од сопственоста на салата ќе бидат предадени на Градот Скопје.
-Владата предводена од СДСМ во мојот мандат донесе одлука за одземање на ингеренциите над Универзална сала од Градот Скопје и истите ги префрли на Министерството за култура со што министерката за култура Костадиновска Стојчевска имаше повеќе овластувања да го потпише договорот со Градот Скопје за продолжување на реконструкција на Универзална сала. И министерката и службите во Министерството во рекорден рок ги завршија сите процедури и еве сме денес тука на чекор од овој долгогодишен сон на скопјани и исто така да истакнам благодарност до министерката и до нејзините колеги за вложениот труд којшто го направија во текот на изминатата година со цел овој процес на реконструкција да може повторно да отпочне, односно да продолжи, рече Ковачевски.
Инаку, за оваа година за реконструкцијата на Универзалната сала се обезбедени вкупно 120 милиони денари. За 2025 година се обезбедени 443 милиони денари и истата таа сума се предвидува и за во 2026 година.