По повод вчерашните протести одржани пред домот на Фросина Ременски, пратеничката од СДСМ изјави дека денеска ќе поднесе кривична пријава за насилство против Тони Јаревски, советник на ВМРО-ДПМНЕ во Општина Карпош и претседателот на партискиот ОК, Сашо Лазаревски.
Таа смета дека група на граѓани се органзирани политички да изнесуваат навредливи зборови и да се закануваат по сигурноста и безбедноста на нејзиниот дом и семејство, што е гарантирано уставно право на секој граѓанин на РМ, како право на приватност, на неповредливост на домот и право на заштита и живот.
„Јас најавив кривична пријава и денеска ќе ја поднесам до ОЈО во Скопје, затоа што моите сознанија и докази со кои располагам, говорат дека зад организирањето на хулиганството пред мојот дом, стои Општинскиот комитет на ВМРО-ДПНЕ од Општина Карпош, заедно со актуелен советник и претседател на ОК на партијата, поранешен претседетал на ОК, повеќе вработени во јавни институции во РМ… Конечно во РМ нема да може да се практикува таков тип самоволие пред домови на пратеници кои согласно закон и Устав имаат право и обврска да гласат за закони по лично и сопствено убедување“, рече Ременски во изјава по конститутивната седница на Буџетскиот совет на Собранието на РМ.
Ременски додава и дека не станува збор за протест, бидејќи не е најавен до надлежни институции и повика ВМРО-ДПМНЕ да се огради од нивна организација.
Потврди дека се чувствува небезбедно, а кривичната пријава што ќе ја поднесе согласно Кривичниот законик, предвидува и казна затвор за организаторите и учесниците на немирите.
И покрај најавените мерки за заштита на пратениците и нивните домовови, полицијата се поставила професионално, но според погрешен закон.
Таа смета дека наместо според Законот за протести, полицијата требало да постапува по Законот за јавен ред и мир, кој предвидува безулсовна заштита на сите граѓани на РМ на кои им се загрозени правата и имотот, како и според првата надлежност на полицијата, а тоа е да ги заштитува животот, правата, слободата, имотот на граѓаните, независно од тоа која функцијата која ја имаат во општеството.