Пратеничката на СДСМ, Фросина Ременски сè уште чека одговор по кривичната пријава до Основното Јавно Обвинителство (ОЈО) што ја поднесе во мај против поранешната министерка за внатрешни работи, Гордана Јанкуловска и екс заменик директорот на Управата за безбедност и контраразузнување (УБК), Сиљан Аврамовски за непочитување на законските одредби за пензионирање, пренесува мкд.мк.
Со индициите за сторени кривични дела злоупотреба на службена положба и овластување и за несовесно работење во службата, Ременски вели дека се запознала преку пошта од анонимно лице во февруари оваа година, наведува порталот. Како член на собраниската Комисија за надзор над работата на УБК и на Агенцијата за разузнавање (АР), таа, за случајот, ги запознала и надлежните овластени лица – Оливер Спасовски, актуелен министер за внатрешни работи, и Весна Доравеска, помошник министер за правни и кадровски работи во МВР.
„Ова е важно и за утврдување дали станува збор за овластен, односно неовластен пристап до доверливи информации и дали лицето извршува работи и издава наредби на вработени во Управата од позиција на лице кое нема законски основа да извршува такви работи“, е наведено во пријавата.
Состанокот на комисијата за надзор над работата на УБК на која се разгледувале годишните извештаи се одржала на 23 мај, а присуствувал и тогашниот директор на УБК, Горан Николовски, кој, исто така, бил запознат со сомнежите за сторено кривично дело.
За време на увид на собраниска Комисија во јуни 2018 година, покрај раководството на Управата бил присутен и Сиљан Аврамовски кого тогашниот директор на УБК, Горан Николовски го претставил како „лице одговорно за операции“. На прашањето на пратеничката Благица Ласовска, која е член на Комисијата, дали во Управата има ангажирано лица што се пензионери, Николовски дал негативен одговор.
Аврамовски, како заменик директор на УБК, е пензиониран на 31 мај во 2014 година со решение потпишано од министерката Јанкуловска. Но, исто така, со потпис на Јанкуловска тој „противправно останал на работното место заменик директор на УБК при МВР до неговото конечно пензионирање на 31 октомври во 2017 година и спротивно на законот бил корисник на основна плата и други додатоци на плата цели три години“, стои во пријавата.
Освен до ОЈО, Ременски за случајот поднела пријава и до Државната комисија за спречување на корупција (ДКСК) од каде велат дека за предмет бараат дополнителни документи од МВР.