Унион Берлин ќе дебитира во фудбалската Бундеслига во наредната натпреварувачка сезона. Екипата од главниот град на Германија го слави историскиот успех по ремито без голови на домашен терен против Штутгарт (првата средба заврши 2:2), па поради постигнатите голови во гости е севкупен победник во бараж двомечот.
Второлигашот се реши за одбрана на резултатот од Штутгарт. Популарните „шваби“ очекувано нападнаа во потрага по гол, имаа посед на топка од 61 отсто, упатија двојно повеќе закани (14:7) од кои размерот во рамки на гол беше 6:1, но противничката мрежа остана мирна до последниот свиреж на главниот судија.
Ова е најголем успех на клубот што е формиран во 1966 година како наследник на Олимпија што беше формирана во 1906 година. Во периодот на Студената војна се натпреваруваше во фудбалската лига на Источна Германија и во федерален ранг стигна по падот на Берлинскиот ѕид меѓутоа досега немаше учество во Бундеслигата.
За разликата од Унион Берлин, трикратниот германски шампион Штутгарт по третпат во сопствената историја ќе игра во Втора лига или популарната „Цвајте“ во која последен пат се натпреваруваше во сезоната 2015/16.