Северна Македонија напредуваше за три позиции во изминатите 12 месеци на Светската листа на слобода медиумите што ја изготвува невладината организација „Репортери без граници“ со седиште во Париз. Од 95. место, земјава се искачи на 92. место со средна оценка од 31,28 поени.
„Владата не го смени законот за јавни медиуми, а реформата на јавниот радиодифузер е запрена. Неговите програми служат на интересите на поранешната владеачка конзервативна партија, ВМРО-ДПМНЕ. Актуелната влада го отстрани државното рекламирање во медиумите, алатка на претходната влада за контрола на медиумите, што честопати доведе до проневера на јавните фондови“, се наведува во делот за Северна Македонија, насловен како „професијата се организира“.
„Репортери без граници“ забележуваат дека на општините им е дозволено да се рекламираат во локалните медиуми и со тоа да задржат средство за нивно контролирање. „Друга ризична одлука на владата: купување реклами во медиумите за запознавање со достигнувањата на владата“, стои во извештајот и се додава дека Здружението на новинари на Македонија (ЗНМ) ја осуди оваа практика.
„Треба да се забележат две револуционерни достигнувања во врска со саморегулацијата и работните стандарди на професионалните новинари. Од една страна, создавањето регистар на професионални мрежни медиуми кој има околу 70 члена од Советот за етика на медиумите и ЗНМ. Оваа иницијатива ја промовира саморегулацијата на медиумите со тоа што ги обврзува да се придржуваат кон кодексот на новинари и да ги објавуваат одлуките на Советот. Од друга страна, потпишувањето од страна на синдикатот, во соработка со ЗНМ и Советот, на Повелбата за услови за работа на новинарите со нацрт договор за фер вработување на новинари и медиумски работници во дигиталните медиуми. Оваа Повелба, исто така, се обврзува да ги почитува правата на новинарите и слободата на изразување“, се вели во извештајот на „Репортери без граници“.
На крајот констатираат дека физичките напади врз новинарите се смирија. „За жал, традиционалните закани и навреди од високи функционери кон печатот остануваат силни, а сајбер-нападите се во пораст“ пишува во извештајот.
Според индексот за слобода на медиумите, на листата пред Северна Македонија во регионот се Грција на 65. место, Косово на 70. и Албанија на 84. место. По Северна Македонија следуваат Србија на 93. место, Црна Гора на 105 место и Бугарија на 111. место.
Лидер на листата е Норвешка, а по неа се Финска, Данска, Шведска и Холандија. Последни, на делба на 177. место, се Кина, Еритреја и Туркменистан.