Парламентот на Република Српска го прифати барањето на лидерот на босанските Срби Милорад Додик да се отповика владиниот извештај со кој се потврдува масакрот на повеќе од 8.000 мажи и момчиња, босански муслимани во Сребреница во 1995 година.
Собранието бара да се формираат „две независни меѓународни комисии за утврдување на вистината за страдањето на сите народи на подрачјето на реонот на Сребреница и за страдањето на Србите во Сараево“.
Додик побара од парламентот на Република Српска да го повлече извештајот од 2004 година, составен од претходната влада, која го призна масакрот во Сребреница, најголемото крвопролевање во Европа по Втората светска војна.
Тој рече дека извештајот е пристрасен, бидејќи не ги спомнува српските жртви.
„Многу работи се случија пред и по тие јулски денови во 1995 година во Сребреница кои јасно укажуваат дека тоа злосторство е договорена трагедија која доведе до сатанизација на Србите и остварување на плановите на некои западни држави за префрлање на вината врз српскиот народ“.
Додик, кој се залага за поделба на Босна и Херцеговина, а делот со босанските Срби да влезе во Србија, отсекогаш ги отфрлаше пресудите на Хашкиот трибунал дека во Сребреница бил извршен геноцид.
Критики од САД
Со отфрлањето на Извештајот на Комисијата за Сребреница, Народното собрание на Република Српска се обидува да ја ревидира историјата, што претставува чекор во погрешен правец, оцени американскиот Стејт департмент.
– Меѓународните судови заклучија дека во Сребреница во 1995 година се случил геноцид. Владата на Република Српска во 2004 година усвои Извештај за Сребреници и тоа беше значаен чекор кон помирување во Босна и Херцеговина и кон соочување со фактите од минатото, соопшти Стејт департментот.
Меѓутоа, со отфрлањето и со обидите за дополнување на Извештајот, дел од институците во Република Српска се обидуваат да ги ревидираат фактите од минатите војни, да ја негираат историјата и да ја политизираат трагедијата, смета Стејт департментот.
Во соопштението се оценува дека „трендот на почитување на осудените воени злосторници како херои“ и отфрлањето на нивните злосторства, нема да им помогне на граѓаните на Репиблика Српска и и оти тоа не е во нивни интерес.
– Страшната војна што се сличи во 90-те години не потсетува дека мораме да тежнееме кон стабилна и просперитетна иднина во интерес на сите граѓани, без разлика на етничката или верската припадност, се наведува во реакцијата на Стејт департментот.
Босанските Срби го зазедоа мнозинскиот муслимански град на 11 јули 1995 година, ги заобиколиле муслиманите во Сребреница и убиле повеќе од 8.000 мажи и момчиња.
Трибуналот на ОН за воени злосторства за поранешна Југославија ги осуди воениот лидер на босанските Срби Радован Караџиќ и неговиот воен командант Ратко Младиќ за масакрот во Сребреница и за други злосторства од војната 1992-1995 година.
Иако Хашкиот трибунал ги означи убиствата во Сребреница како геноцид, Србите никогаш не признаа дека нивните војници го извршиле тоа, а националистичките политичари гледаат на Младиќ и на Караџиќ како на херои.
Инаку, Додик ја има поддршката од Русија за неговите сепаратистички ставови и позиции.