Риши Сунак денес стана третиот британски премиер годинава, со задача да ја заузда економската криза што ги остави финансиите на земјата во несигурна состојба и милиони луѓе се борат да ги платат сметките за храна и енергија.

Сунак денес се сретна со кралот Чарлс Трети во Бакингемската палата, каде што монархот како што е традиција, официјално побара од новиот лидер на владејачката Конзервативна партија да формира влада.

Лидерската позиција во партијата, Сунак ја зазеде вчера (понеделник) по краткиот, катастрофален мандат на Лиз Трас.

Нејзиниот пакет нефинансирани даночни намалувања ги заплаши финансиските пазари со изгледите за раст на долгот, ја доведе фунтата на рекордно ниско ниво и ја принуди Банката на Англија да интервенира – слабеејќи ја кревката британска економија и бришејќи го нејзиниот авторитет во нејзината партија.

„Целосно ценам колку се тешки работите“, рече Сунак пред резиденцијата на премиерот во Даунинг стрит 10. „И јас разбирам, исто така, дека имам задача да ја вратам довербата по сето тоа што се случи. Сè што можам да кажам е дека не се плашам“, рече тој.

Кога беше шеф на Министерството за финансии, Сунак стана популарен во јавноста со делење милијарди поддршка на затворени бизниси и отпуштени работници за време на пандемијата.

Признавајќи ги „тешките одлуки што доаѓаат“, Сунак се обиде да повлече линија под хаосот што ги зафати Трас и нејзиниот претходник, Борис Џонсон. Тој рече дека неговата влада „ќе има интегритет, професионализам и одговорност на секое ниво“.

Противниците веќе го прикажуваат Сунак како човек што нема контакт со реалноста, поради неговото привилегирано приватно училиште, претходната кариера како менаџер на хеџ фонд и огромното богатство. Голем дел од богатството на Сунак доаѓа преку неговата сопруга Акшата Мурти, чиј татко е милијардер основач на индиската ИТ фирма Infosys. Брачната двојка вреди 826 милиони долари, според листата на богати на Sunday Times.

Во април 2022 година, излегоа информации дека неговата сопруга Мурти не платила данок на Велика Британија за нејзиниот приход во странство. Оваа практика беше легална – и Мурти набрзо се согласи да се откаже од неа – но изгледаше лошо во време кога милиони Британци се мачеа да врзат крај со крај.

Победата на Сунак е голем пресврт на среќата само неколку недели откако тој загуби од Трас на изборите за да го замени Џонсон. Тој сега е избран за лидер на конзервативците откако стана единствениот кандидат кој ја надмина пречката од 100 номинации од колегите пратеници за да се кандидира на партиските избори. Сунак ја победи ривалката Пени Мордоунт, која денес даде оставка од владата, и соборениот Џонсон, кој се врати од одмор на Карибите за да собере поддршка за кандидатурата, но не успеа да ја добие.

Извор: Асошиетед Прес