Специјалната јавна обвинителка, Ленче Ристовска одговарајќи пред тројца новинари во „Топ Тема“ на телевизија Телма, ги отфрли обвиненијата од здружението на новинари МАН, дека Специјалното јавно обвинителство работи против медиумите.

Како што вели Ристовска, од над 60 лица кои се дел од истрагите на СЈО само тројца се поврзани со медиуми, но за ниту еден од нив не е побарано да се блокира нивната сметка, така што медиумите работат без проблем.

Специјалната јавна обвинителка потенцираше дека тоа што некој е новинар и е присутен во јавноста, не значи дека за истото лице не треба да се зборува доколку доказите покажуваат дека се под кривична одговорност, бидејќи никој не може да биде амнестиран доколку работел против законот.

Одговарајќи на новинарско прашање, зошто баш одредени специфични факти од случајот „Тифани“, во кој се истражува работата на фирмите „Смарт центар“ и „Смарт груп“ во кои Ивона Талевска некогаш била директорка, беа презентирани во јавноста, Ристовска вели, она што тие го изнеле на последната прес-конференција е само еден мал дел од она што го поседуваат како докази, и доколку презентирале други, во јавноста можеби би имало и уште посилни реакции.

Ристовска тврди дека за се она што го тврдат на прес-конференции, тие имаат основани сомненија.