Со автоголот на Ненад Мишковски од 58. минута, Работнички ги освои трите бода против Ренова (1:0) во воведниот меч од деветтото коло во македонскиот фудбалски шампионат. „Црвените“ од Градски парк имаа прилика и за дуплирање на предноста во финишот на средбата, но Иван Марковиќ не успеа да погоди од белата точка во 81. минута.
За четирикратниот македонски првак ова е трет триумф во сезоната што е запишан на 82. роденден и со кој барем на 24 часа се проби до седмата позиција на табелата со 10 бода колку што има и Шкендија, но тетовци утре попладне од 15 часот ќе бидат домаќини на Вардар.
Прволигашки фудбал во истиот термин ќе има на уште три локации во државата. Академија Пандев ќе го пречека тимот на Силекс, Македонија во Ѓорче Петров ќе игра со Шкупи, а Борец ќе биде домаќин на Струга Трим Лум.