Иранскиот претседател Хасан Рохани денеска најави дека неговата држава е подготвена да реагира на било која одлука што САД ќе ја донесат во врска со нуклеарниот договор.
Американскиот претседател Доналд Трамп најави дека до 12 мај ќе реши дали САД ќе останат во договорот, со кој беа намалени санкциите против Иран во замена за иранското ветување дека ќе ја замрзнат својата нуклеарна програма. Договорот со Иран беше потпишан од американскиот претседател Барак Обама и водачите на Русија, Кина, Британија, Франција и Германија, а Трамп жестоко го критикуваше за време на предизборната кампања и по преземањето на функцијата.
„Ние имаме планови и ќе се спротиставиме на било која одлука што Трамп ќе ја направи во врска со нуклеарниот договор“изјави претседателот Рохани.
По посетите на водачите на Франција и Германија, Емануел Макрон и Ангела Меркел на Вашингтон, вчера и британската премиерка Тереза Меј го убедувала претседателот на САД Доналд Трамп да не се повлекува од нуклеарниот договор со Иран. Трамп и Меј разговарале за иранското прашање по телефон, а британскиот шеф на дипломатијата Борис Џонсон отпатува во посета на Вашингтон, на средби со потпретседателот Мајк Пенс и советникот на Трамп Џон Болтон.
„Обединетото Кралство, САД и нашите европски партнери се обединети во напорите да се спротиставиме на иранското однесување со кое Блискиот Исток станува помалку безбеден, да се спротиставиме на нивните кибер активности, нивната поддршка за групи како Хезболах, и на нивната опасна ракетна програма со која ги вооружуваат Хути бунтовниците во Јемен“изјави Џонсон пред посетата на Вашингтон.
Критичари на договорот во САД обвинуваат дека милијардите долари што Иран ги доби по олеснувањето на санкциите биле употребени за проширување на војните во Сирија и Јемен.