Нико Розберг за првпат во кариерата се закити со шампионска титула во Формула 1. Германскиот пилот на Мерцедес го освои второто место во Абу Даби и со 385 бода го задржа водството во генералниот пласман пред денешниот победник во пустинската трка, Луис Хамилтон.
„Воопшто не ми беше забавно во последните кругови. Мило ми е што заврши. Во екстаза сум и горд што го направив ова што мојот татко (Кеке Розберг) го стори пред 34 години“, рече Нико Розберг по настапот за Големата награда на Обединетите Арапски Емирати.
Хамилтон во Абу Даби го оствари десеттиот триумф во сезона, Розберг заврши со девет и една незавршена трка помалку од Британецот. Трикратниот првак заостануваше 12 бода зад клупскиот колега пред финалниот предизвик. За одбрана на тронот му беше потребна победа и истовремено да го нема Германецот крај себе на пиедесталот. Првиот услов го исполни, вториот не одеше во негов прилог.
„Титулата ја посветувам на сопругата и ќерката, на другите ќе мислам подоцна. Честитки за Луис. Имаше одлична сезона. Беше голем ривал што секогаш е тешко да се победи“, додаде Розберг.
Хамилтон имаше одличен финиш на сезоната. Приличното заостанување го сведе на само 12 бода и внесе драма во Формула 1 шампионатот во борбата за титулата каква ретко имавме прилика да гледаме во изминатите неколку години. Четвртата победа во низа, вкупно 53 во кариерата, сепак, не му беше доволна за примарната цел. Разочаран не е. Му честиташе на Розберг и порача дека се чувстува извонредно.
„Благодарност до семејтвото и мојот тим за поддршката. Мислам дека оваа победа е 32 за мене по доаѓањето во Мерцедес. Честитки за Нико за првата титула. Направив се што можев во последните четири трки и само тоа можев да барам од себе. Вечерва се забавував, славев со тимот, па не можете да освоите се“, рече Хамилтон.
Првата титула Британецот ја освои во 2008 година. Во 2014 година ја освои втората, лани ја одбрани, а оваа година, сепак, не успеа до хет-трик.
„Имав многу проблеми оваа година и затоа сум во оваа позиција. Но, и натаму сум благодарен на сите успеси, на сите подеми и падови со екипата. Нико ти честитам, возеше фантастично“, дополни Хамилтон.