Европската комисија следната недела ќе објави Пакет за проширување во кој се проценува состојбата во државите кои настојуваат да се придружат на 28-члениот блок, објавува Радио Слободна Европа, повикувајќи се на документот што ќе биде објавен на 17 април во Стразбур, а во кој нивните дописници имале увид.
Според извештајот, „шампион во регионот е Албанија, а Македонија ќе добие препорака за отворање на пристапните преговори и позитивни оцени за новата влада.
Критични точки во сите држави од Западен Балкан остануваат оние што се поврзани за владеењето на правото, а „организираниот криминал и корупцијата остануваат синоним за секоја држава во регионот“.
-ЕК повторно во повеќе наврати го користи изразот заробени држави. Јавната управа во државите до регионот останува слаба, и малку или воопшто нема прогрес на полето на слобода на изразување, стои во извештајот на кој се повикува РСЕ.
Во извештајот повторно се нагласува дека „билатералните спорови и понатаму се главни пречки во процесот на евроинтеграција, и во претходниот период не е постигнат ниту еден резултат во решавање отворени прашања меѓу соседите“.
Европската комисија повторно препорачува отворање на пристапните преговори со Македонија, а извештајот за напредокот на Македонија е меѓу попозитивните во овој пакет на Брисел, кој, како што стои во извештајот, „јасно ја препознал политичката волја за напредок“.
Во извештајот за Македонија, јавуваат дописниците на РСЕ од Брисел, се предупредува дека „штетата која се правела години на назад не може да се среди преку ноќ“, но дека Македонија ја надминала длабоката политичка криза и дека структуралните реформи се долг процес кој може да потрае.
Во истиот нацрт-извештај за Македонија се нагласува дека за понатамошен напредок на земјата од одлучувачка важност се задржувањето и продлабочувањето на процесот на донесување на итните реформски приоритети.