Заборавеното и разурнато училиште „Димитар Влахов“ во преспанското село Љубојно ќе се обнови и ќе стане Центар за промоција на македонскиот јазик. На 15 ноември во 1945 година во ова училиште се одржал првиот час на македонски јазик во Преспа и второ е училиште во Македонија, по она во кичевското село Подвис во кое се држела настава на мајчин јазик. Седумдесет и шест години подоцна објектот се распаѓа, разурнат е, обраснат е со треви и непознат за пошироката јавност.

Денеска, на двегодишнината од потпишувањето на историскиот Преспански договор (на 17 јуни 2018 во селото Нивици на Преспанското Езеро) со кој е затворен тридеценискиот спор за името меѓу Македонија и Грција, ќе почне трансформацијата на училиштето „Димитар Влахов“ во Центар за промоција на македонскиот јазик.

Најпрво ќе се прави проект за комплетна реконструкција на објектот за тој да го добие некогашниот карактеристичен изглед и потоа ќе биде претворен во Центар за промоција на македонскиот јазик. Посетителите во Центарот ќе може да добијат информации за настанување и озаконувањето на македонската азбука и воведување на македонскиот јазик за службен јазик во државата.

Зградата на училиштето, како што објави порталот sdk.mk, била изградена уште во 1907 година и се користела како училиште во тоа време. Како што раскажуваат жителите на Љубојно од ослободувањето до сега низ училиштето „Димитар Влахов“ минале над 6.000 ученици.

Од училишната зграда на „Димитар Влахов“ сега се останати само делови од влезот и надворешните ѕидови од некогашниот масивен објект со специфична архитектура. Училиштето е без таван, врати и прозорци, а наместо училници, внатрешноста е обрасната. Ги нема ниту дрвените скали кои од приземјето воделе кон училниците на првиот кат.

Дека тука пред 76 години се одржал првиот час по мајчин јазик сведочи само спомен плочата која е поставена на некогашниот влез на училиштето. Благодарение на спомен плочата, што во 2004 ја поставија просветни работници во чест на 60-годишнината од наставата по македонски јазик, денес минувачите дознаваат дека ова школо е со значајна историја за македонскиот јазик и образование.