Канцеларијата на рускиот генерален обвинител го класифицираше „Дојче Веле“ (ДВ), германски медиум финансиран од владата на земјата, како „непожелна организација“, објавија руските медиуми. Класификацијата беше побарана од руската државна Дума уште во август.
ДВ сега им се придружува на голем број други медиумски организации, невладини организации и фондации кои веќе се означени како „непожелни“, вклучувајќи ги Радио Слободна Европа, Белингкет, CORRECTIV, Репортери без граници (MSF) и ТВ Дожд, објави DW.
Според сегашниот руски закон, ознаката за „непожелна организација“ ја прави секоја соработка со таква организација кривично дело казниво со високи парични казни или дури и затвор. Дури и споделувањето содржини од такви организации, вклучително и на социјалните медиуми, е казниво, се вели во соопштението.
Генералната директорка на ДВ, Барбара Масинг, изјави дека потегот на руските власти е уште еден знак дека Кремљ сака да ја задуши целата слобода на изразување во земјата.
„Русија може да нè означи како непожелна организација, но тоа нема да нè обесхрабри“, рече таа во соопштението.
Масинг додаде дека овој последен обид за замолчување на слободните медиуми го покажува очигледното непочитување на рускиот режим кон слободата на печатот и го открива неговиот страв од сопствените граѓани, оние кои бараат информации, размислуваат критички и сакаат да учат.
Според неа, ДВ ќе остане доследен во обезбедувањето новинарска содржина, дозволувајќи им на луѓето да формираат свои мислења. ДВ е етикетиран како „странски агент“ во Русија од март 2022 година, а пред тоа се соочи со забрана за емитување.
ДВ на руски јазик достигна околу 10 милиони корисници неделно во 2025 година, главно преку видео содржина.
За да ја заобиколи цензурата од руските власти, ДВ сè повеќе се потпира на дигитални платформи и нуди алатки за заобиколување на блокадите, како што се прелистувачот Tor, VPN пристапот и апликацијата DW, според „Дојче Веле“.
Според Масингова, и покрај цензурата и блокирањето на услугата од страна на руската влада, услугата на ДВ на руски јазик сега достигнува до повеќе луѓе од кога било досега.