Русија истрелала речиси 300 дронови, 18 балистички ракети и седум крстосувачки ракети кон осум региони, објави украинскиот претседател Володимир Зеленски на социјалните мрежи.
Русија во текот на ноќта изврши втор голем бран напади со дронови и со ракети врз Украина во рок од четири дена, соопштија владини претставници во вторникот, повторно насочувајќи се кон електроенергетската мрежа во услови на екстремно ниски температури, објави „Асосиејтед прес“.
Нападот се смета за јасна порака на игнорирање на напорите за мир предводени од САД, во време кога руската инвазија врз соседната земја се приближува кон четвртата година.
Русија во текот на ноќта истрелала речиси 300 дронови, 18 балистички ракети и седум крстосувачки ракети кон осум региони, објави украинскиот претседател Володимир Зеленски на социјалните мрежи.
Еден од ударите во североисточниот регион Харков усмртил четири луѓе во магацин на поштенска служба, а неколку стотици илјади домаќинства останале без електрична енергија во регионот на Кијив, изјави Зеленски.
Дневната температура во Кијив, кој повеќе од две недели е изложен на силен студ, изнесувала минус 12 степени Целзиусови, со улици покриени со мраз и со постојан звук на генератори што се слушал низ целата престолнина.
Кијив со денови се соочува со сериозен недостиг од електрична енергија, а градоначалникот Виталиј Кличко изјави дека нападите во понеделникот навечер предизвикале најголем електричен прекин што градот го доживеал досега.
Повеќе од 500 станбени згради и натаму биле без централно греење во вторникот. Низ градот, оголените дрвја биле натежнати од мразулци, а снегот бил натрупан покрај тротоарите. Пријатели и роднини се собирале во станови кои сè уште имале струја или топла вода, барем привремено, за да ги наполнат телефоните, да се истушираат или да испијат топол пијалак.
Кличко нареди градот да обезбеди по еден топол оброк дневно за најзагрозените жители. Тој најави и бонуси за работниците во водоводните, грејните и на патните служби, кои работат „дење и ноќе“ за да ја обноват клучната инфраструктура.
Четири дена претходно, Русија, исто така, испрати стотици дронови и десетици ракети во масовен ноќен напад и, по само вторпат во војната, употреби нова моќна хиперсонична ракета која ја погоди западна Украина. Нападот се смета за јасно предупредување до сојузниците на Украина во НАТО дека Москва нема да се повлече.
Во понеделникот, САД ја обвинија Русија за „опасна и необјаснива ескалација“ на борбите, во момент кога администрацијата на Трамп се обидува да ги унапреди мировните преговори.
Заменик-амбасадорката на САД во Обединетите нации, Тами Брус, на вонредна седница на Советот за безбедност изјави дека САД се длабоко загрижени поради, како што рече, „загрижувачкиот број цивилни жртви“ во Украина и остро ги осуди сè поинтензивните руски напади врз енергетската и критичната инфраструктура.
Според украинските власти, Москва со ваквите удари систематски се обидува да им го ускрати греењето и пристапот до вода за пиење на цивилите за да го ослабне отпорот на населението кон руската инвазија започната на 24 февруари 2022 година — стратегија што Киев ја нарекува „вооружување на зимата“.
Во последните напади, во регионот Харков биле ранети уште 10 луѓе, додека во јужниот град Одеса шестмина се повредени, а оштетени се болница, градинка, образовна установа, енергетска инфраструктура и бројни станбени објекти.
Според Обединетите нации, 2025 година била најсмртоносна за украинските цивили од почетокот на војната, со 2.514 загинати и 12.142 повредени — пораст од 31 отсто во однос на 2024 година.
Украинскиот претседател Володимир Зеленски побара побрзи испораки на системи за противвоздушна одбрана од САД и од Европа, додека Москва соопшти дека нејзината противвоздушна одбрана соборила 11 украински дронови, а Киев потврди дека погодил фабрика за производство на беспилотни летала во рускиот град Таганрог.