Русите почнаа со враќањето на телата на убиените украински војници во челичарницата Азовстал која стана симбол на украинскиот отпор. Мртвите извадени од урнатините на бомбардираната челичарница се префрлени во главниот град на Украина, Киев, каде што е во тек ДНК-тест за идентификација на посмртните останки, соопшти портпаролката на Азовскиот полк.
Азовскиот полк беше меѓу украинските единици кои ја бранеа челичарницата речиси три месеци пред да се предадат во мај под немилосрдните руски напади од земја, море и воздух. Упорната одбрана на челичарницата од страна на украинските борци ги помати сметките на Кремљ за брзо заземање на Мариупол и ги задржа долго време руските борбени сили во стратешкиот пристанишен град.
Судбината на бранителите кои паднаа во руски раце е се уште неизвесна. Зеленски рече дека повеќе од 2.500 борци од фабриката се држат во затвор, а Украина работи на нивно ослободување.
Украина во саботата ја објави првата официјално потврдена размена на мртви тела на војници од почетокот на војната. Се вели дека двете страни размениле вкупно 320 тела, при што на секоја им биле вратени 160 комплети посмртни останки. Размената се случила во четвртокот во регионот Запорожје.
Ана Холовко, портпаролка на Азовскиот полк, рече дека сите 160 украински тела што ги предале Русите се од урнатините на Азовстал. Таа рече дека најмалку 52 од тие тела се смета дека се на војници на Азовскиот полк. Најмалку два камиони со тела од Азовстал биле префрлени во воената болница во Киев за идентификација.
Во меѓувреме, руските сили продолжија да се борат за контрола на Сиевиеродонецк, град во источна Украина, кој е клучен за целта на Москва да го заврши заземањето на индустрискиот регион Донбас.
Зеленски рече дека силите на Москва имаат намера да го заземат југоисточниот град Запорожје, дом на повеќе од 700.000 луѓе, потег што може сериозно да ја ослабне позицијата на Украина и да и дозволи на руската војска да напредува поблиску до центарот на државата. „Во регионот Запорожје е најзаканувачката ситуација“, рече Зеленски. (АП)