Повеќе од 250 лица се уапсени за време на денешниот протест во Москва, наведуваат активисти за човекови права, пренесе агенцијата ДПА. Стотици руски активисти протестираа пред канцеларијата на московскиот градоначалник, откако неколкумина опозициски кандидати на контроверзен начин не се најдоа на гласачкото ливче за изборите што следат за Градскиот совет, се вели во веста.
Полицијата претходно предупреди дека ќе казнува за протестот што не беше одобрен од градските власти. „Беше наведено дека ќе бидат преземени сите неопходни мерки“ за да „ се спречи секакво нарушување на јавниот ред“, наведе државната агенција Тасс.
За време на протестот полицијата го затвори пристапот до Градската куќа за автомобили и автобуси и на многу демонстранти им бараше лични документи, додава ДПА.
Еден од демонстрантите, кој анонимно зборуваше за ДПА, кажа дека тие легално се таму, но дека политичарите ги кршат нивните права.
Демонстрантите протестираат што независните кандидати не добија дозвола да се најдат на гласачкото ливче за изборите закажани за 8 септември. Вкупно 57 кандидати беа одбиени да учествуваат во изборите, вклучувајќи го и проминентниот критичар на владата, Илја Јашин.