59-годишен државјанин на Русија бил приведен во полициска станица откако нападнал полициски службеник во центарот на Скопје. Настанот се случил вчеравечер половина час пред полноќ, во познат локал во Дебар Маало. При обид да биде легитимиран од страна на припадник на МВР, тој физички го нападнал полицискиот службеник. Како што дознава НОВА, лицето со иницијали Н.П.К се води како административно технички персонал во Руската федерација.
Од МВР информираат дека се преземаат мерки за расчистување на случајот.
Пред четири дена руски дипломат беше прогласен за персона нон грата во Северна Македонија и доби рок од една недела за да ја напушти земјата. За случајот извести македонското Министерство за надворешни работи, а го потврди и претседателот Стево Пендаровски, кој посочи дека станува збор за документиран случај, а не за импровизација.
Одлуката била донесена откако на 14 мај, во просториите на Министерството за надворешни работи бил повикан амбасадорот на Руската Федерација, при што му била врачена нота со која се наложува посочениот дипломат да ја напушти македонската територија во рок од седум дена.