Ако сметав дека треба да биде повикан Никола Груевски да сведочи за 27 април, ќе го повикав. Тој дента не беше во државата. Не знам на кои околности ќе го испрашува одбраната ако го повика да сведочи, рече обвинителката Вилма Рускоска за настаните од 27 април, одговарајќи на новинарско прашање за информациите дека одбраната го предложила поранешниот премиер да биде сведок во постапката.
Во изјава за медиумите Рускоска посочи дека во интерес на обвинетите е судската постапка да заврши што побргу.
– Не е точно дека рочиштата траат и по 13 часа, го следите судењето, знаете дека има долги пауза. Со ништо не е нарушено правото на одбрана на обвинетите. Бидејќи сите на почетокот се изјаснија дека не се виновни, тогаш во нивен интерес е да се заврши постапката за евентуално да докажат и да можат што побргу да бидат ослободени – изјави обвинителката.
Обвинителката Вилма Русковска, на новинарско прашање, рече дека се уште е во предистрага предметот за нарачателите за насилството во Собранието.
-Јас стварно се надевам дека ќе има одговорност, рече Русковска.
Таа зборуваше и за преквалификација на делото кое им се става на товар на обвинетите- терористичко загрозување на уставниот поредок и безбедноста, за кое рече дека е истото уште од отворањето на истрагата и не е точно дека првично било тероризам.
Случајот бил ставен на колегиум пред обвинители и од републичкото и од вишото јавно обвинителство, рече таа, и сите обвинители застанале зад мислењето дека станува збор за терористичко загрозување на уставниот поредок и безбедноста.
Прашана дали се чувствува безбедна, обвинителката Рускоска, кусо и отсечно одговори со да.
Судењето продолжува по еден час пауза, каде ќе бидат сослушани уште тројца сведоци.
На денешното продолжение на судењето за крвавиот четврток сведочеше Ацо Ангеловски, поранешен телохранител на Оливер Спасовски.
Претседателот на судечкиот совет Добрила Кацарска, пред почетокот на судењето кажа дека во однос на реакциите за траењето на судските рочишта, тоа е поради економичност на судскиот процес и согласно конвенцијата на европскиот суд за човекови права, која голем акцент става на правото на судење во разумен рок.
За случувањата во Собранието на Република Македонија на 27 април 2017 година обвинети се вкупно 33 лица од кои 31 лице за терористичко загрозување на уставниот поредок на државата и двајца за поттикнување.
Меѓу обвинетите се повеќе пратеници, вработени во МВР и собраниското обезбедување, уметници и граѓани.