Новите американски царини што ги објави американскиот претседател Доналд Трамп не го прекршуваат договорот за НАТО, изјави денеска генералниот секретар на НАТО Марк Руте по средбата со министрите за надворешни работи на земјите-членки на воената алијанса во Брисел.
Неговата изјава е одговор на новинарско прашање за воведувањето на американските царини, што се однесува на член 2 од Северноатлантскиот договор, во кој се вели дека сојузниците на НАТО „ќе настојуваат да ги елиминираат конфликтите во нивната меѓународна економска политика и ќе ја охрабруваат економската соработка“ меѓу која било или сите членки.
Во Брисел вчера и денеска министрите за надворешни работи на НАТО разговараат за понатамошните планови за претстојниот самит во Хаг и за итните безбедносни прашања.
Американскиот претседател Доналд Трамп во средата воведе реципрочни царини за повеќе од 180 земји и територии во светот. Администрацијата на Трамп, која го прогласи 2 април за „Ден на ослободувањето“, воведе и царини од 25 отсто за увоз на сите автомобили од странско производство.
Претходно, Руте нагласи дека Континуираната посветеност на САД останува основата на безбедноста на НАТО
Американскиот државен секретар Марко Рубио во четвртокот изјави дека администрацијата на Трамп е посветена на останување во НАТО и ги повика 32-те членки на воената алијанса да ветат дека ќе ги зголемат трошоците за зајакнување на нивните одбранбени способности.