Филмот (Everything Everywhere All at Once) на режисерите Даниел Кван и Даниел Шајнарт за семејство кинески емигранти кои патуваат низ мултиверзуми и ја откриваат смислата на животот, апсолутно триумфираше во речиси сите главни категории на годинешното доделување на престижната холивудска награда.
Брендон Фрејзер доби Оскар за најдобар актер за улогата во филмот „Кит“. И двата филма се дел од продуцентската куќа „А24“, која е специјализирана за мали независни филмови.
„Сè насекаде одеднаш“ освои Оскар за режија, главна актерка, спореден актер, споредна женска улога, оригинално сценарио, монтажа и најдобар филм. Мишел Јео е првата актерка од Азија што освоила Оскар за главна улога.
Филмовите „Елвис“, „Тажачките на Инеширин“ и „Тар“ беа најголемите губитници на ноќта.
Џејми Ли Кертис освои Оскар за споредна женска улога и Ки Хај Квуан за споредна машка улога.
Германската адаптација на „На запад ништо ново“, ремек-делото на романсиерот Ерих Марија Ремарк за ужасите од Првата светска војна, во Лос Анџелес освои Оскар за најдобар странски филм.
За најдобар анимиран филм е прогласен „Пинокио“ на Гиљермо дел Торо, а за краток анимиран филм, „Оскарот“ отиде кај „Момчето, кртот, лисицата и коњот“. Најдобар краток филм, според Академијата, е „Ирско збогување“.
Најдобар документарен филм е „Навални“ на режисерот Даниел Роер. Најдобар краток документарец е „Слонови шепкачи“ на Картики Гонсалвес.
Овогодинешното доделување на Оскарите доаѓа со една голема промена – црвениот тепих веќе не е црвен, туку бојата на шампањот.
Водител на церемонијата беше Џими Кимел, за кого ова е трет ангажман за Оскар.
За разлика од минатата година кога церемонијата беше засенета со шлаканицата што ја доби еден од најавувачите на награди, оваа година „црниот оскар“ му припадна на британскиот актер Хју Грант кој се „прослави“ со потценувачки однос во интервјуто што му беше направено по повод неговиот филм. Тој на прашањата одговараше кратко и без суштина, речиси со потсмев кон водителката на која и беше доделено неформално признание од набљудувачите дека заслужила „Оскар“ што останала присебна и професионална пред британскиот намќор Грант.