Стејт департментот на САД денеска јавно ги именуваше поранешниот премиер на Република Северна Македонија Никола Груевски и поранешниот директор на Одделот за безбедност и контраразузнавање (УБК) Сашо Мијалков и им забрани влез на нивна територија.
„Ги презедовме овие активности како одговор на вмешаноста на овие поранешни функционери во значителна корупција. Нивните постапки го поткопаа владеењето на правото, демократските институции и јавните процеси во двете земји и ја нарушија вербата на јавноста во нивните влади“, се вели во одлуката која попладнево претставници на Стејт Департментот ја споделија со медиумските куќи од Северна Македонија и од регионот.
Во одлуката на американската влада се додава дека Груевски кој е сега во бегство, во неговото службено својство на премиер, бил вмешан во коруптивни дела кои вклучуваат користење на неговото политичко влијание и официјална моќ за лична корист. „Поточно, има веродостојни информации дека Груевски ја злоупотребил моќта на својата функција за да бара и прима мито во замена за владини договори, присвоил јавни средства и се мешал во изборните процеси за да има политичка корист за себе и за неговата партија“, додаваат изворите од Стејт Депармент.
За Мијалков се вели дека во своето службено својство на директор на УБК, бил вмешан во коруптивни дејствија кои вклучуваат користење на неговото политичко влијание и службена моќ за лична корист. „Има веродостојни информации дека Мијалков ја злоупотребил моќта на својата функција за да бара мито во замена за владини договори и се вмешал во изборните процеси за да има политичка корист за себе и за неговата партија“, велат американските претставници.
Поради сето тоа Груевски и Мијалков и нивните потесни семејства се неподобни за влез во САД, се наведува.
„Овие чекори ја потврдуваат посветеноста на САД за поддршка на владеењето на правото и зајакнување на демократските институции на Република Северна Македонија и Босна и Херцеговина. Одделот ќе продолжи да ги користи ваквите мерки за да промовира одговорност за корумпираните актери во овој регион и на глобално ниво“, велат од Вашингтон.
Во истиот пакет мерки се опфатени и претставници на Босна и Херцеговина.
Воведени се и економски санкции, како што се вели, на седум лица и еден ентитет низ четири земји од Западен Балкан, меѓу кои и за Груевски и Мијалков. Санкциите значат замрзнување на имотот што го имаат во САД и забрана за пристап до него и негово користење. (С.К.)