Администрацијата на САД не смета дека е потребно државниот секретар Марко Рубио да присуствува на долго планираниот состанок на министрите за надворешни работи на НАТО во Брисел, и покрај тековните разговори за потенцијално мирно решение за војната во Украина.
„Рубио веќе присуствуваше на десетици состаноци со сојузниците на НАТО и би било сосема нереално да се очекува од него да присуствува на секој состанок, изјави портпарол на Стејт департментот за ДПА во понеделник, пренесе Ројтерс.
Невообичаено е американски државен секретар да прескокне формален состанок на НАТО, објави германската новинска агенција ДПА.
Не се сеќавам на нешто вакво во поновата историја“, изјави поранешната портпаролка на НАТО, Оана Лунгеску, истакнувајќи дека неговото отсуство би испратило погрешен сигнал, особено во време кога е потребна поблиска координација со европските сојузници за Украина.
Една можна причина би можела да биде тоа што делови од американската администрација го гледаат НАТО како пречка за успешно спроведување на неодамнешната иницијатива на претседателот Доналд Трамп насочена кон прекинување на војната на Русија во Украина.
Неодамнешниот мировен план од 28 точки вклучуваше дел со кој се повикува НАТО целосно да се откаже од пристапувањето на нови членки во блокот. Од планот може да се види дека САД се гледаат себеси помалку како членка на НАТО, а повеќе како надворешен посредник и предлагаат дијалог меѓу Русија и НАТО со посредство на САД.
Клучните европски членки на НАТО, вклучувајќи ги Германија, Франција и Италија, ги критикуваа ваквите делови од планот. Американските претставници реагираа на ова велејќи дека ќе ги решаваат прашањата на НАТО одделно со сојузниците.
Заменик-државниот секретар Кристофер Ландау ќе учествува во разговорите во среда, кои ќе се фокусираат на континуираната поддршка за Украина. Беше објавено дека Рубио бил во Вашингтон во вторник поради други ангажмани во Белата куќа.