Формирањето на новата Влада во Македонија е доказ за почитувањето на законите во државата и ја одразува волјата на граѓаните, слободно изразена преку законски и демократски процеси, вклучувајќи ги изборите во декември 2016, кои што беа признаени од сите партии, пишува во одговорот на САД за извештајот на амбасадорката на ОБСЕ Нина Суомалаинен за политичката ситуација во Македонија.
„Како што му пренесе Заменик претседателот Пенс на Премиерот Заев во телефонскиот разговор на 10. јули, Соединетите Држави продолжуваат цврсто да ги подржуваат Евро-атлантските аспирации на Македонија. Како пријател и партнер на Македонија, се надеваме на соработка со новата влада во имплементацијата на итните демократски реформи кои ќе го зајакнат владеењето на правото и независноста на судството, слободата на медиумите и одговорноста на владата. Соединетите Држави ги поздравува приоритетите на новата влада кои вклучуваат јакнење на институциите во државата, особено правосудството и напорите за интеграција во ЕУ и во НАТО.
Во одговорот се вели дека на мисијата на ОБСЕ во Скопје и останува витална задача да го подржува спроведувањето на Охридскиот рамковен договор, зајакнувањето на институциите, подобрувањето на социјалната кохезија и унапредувањето на меѓуетничките односи.
„Како што е нотирано во вашиот извештај, единицата за владеење на право на мисијата на ОБСЕ продолжува со напредокот во јакнењето на судскиот систем и владеењето на правото, вклучувајќи и обуки на судии и обвинители, развој на практични алатки и материјали за континуирана правна едукација, како и во спроведување на активности за помош на новите студенти по право да ја совладаат новата кривична постапка (Закон за кривична постапка). Ова е важна работа и ги збогатува напорите на вашата мисија во мониторинг, и известување за предметите на специјалното обвинителство“, пишува во одговорот.
Исто така во писмото наведено е дека Соединетите американски држави ќе продолжат да работат со граѓаните и со владата во Македонија за сигурна и просперитетна иднина како мултиетничко општество целосно интегрирани во евроатланските институции.