Претседателот на Здружението на судии, Џемали Саити за новото законско решение за Јавното обвинителство (ЈО) вели дека воопшто не е важно во какви услови е донесено туку што ќе се вгради како одредба.
„Се надевам дека ќе имаме помалку контроверзни одредби туку кристално чисти и јасни одредби што ќе ја олеснат работата на судството, вели Саити во неделното интервју за „Радио Слободна Европа“.
Тој зборува и за тоа како „Рекет“ ќе се одрази врз судството, врз СЈО и за ветингот.
„Генерално сметам дека оваа постапка негативно ќе влијае на рејтингот на судството, на довербата иако, да бидам искрен, се води поприлично јавно, но и поприлично, да речам, на некој фолклорен начин, затоа што сè уште немаме ние конкретни акти по однос на предметот. Последиците по СЈО се познати, негативни се. Ќе се обидат веројатно политичките чинители да најдат решение, рамка, како тоа да се ублажи во однос на целата структура на СЈО, но тука се согласувам и со мислењето на професор Гордан Калајџиев, кој истакна дека судбината на СЈО, сепак, е врзана со првиот човек, затоа што СЈО е јавниот обвинител. Сите други се во функција на вршење на таа дејност“, вели Саити.
Во интервјуто посочува ветингот треба да биде процес на самоевалуација на судиите.
„Ветингот треба да биде процес на самоевалуација на судиите, односно, ние преку нашите одлуки да потврдиме, да докажеме пред јавноста, дека навистина носиме правилно одлуки и немаме проблем со тие работи. Во ова насока мора да го истакнеме и ставот на Прибе кој вели дека имаме проблем со одредена мала група судии кои треба да се процесуираат и да се види дали навистина имаат негативен пристап во судењето. Сметам дека ветингот, пред да се пристапи кон овој процес, доколку се пристапи, треба навистина да се обмисли од аспект на последиците по него, дали ние сакаме прочистување на судии или сакаме состојба да нема кој да суди. Тоа се многу симптоматични прашања, затоа сметам дека премиерот Зоран Заев можеби овие аспекти ги опфаќа, вели Саити во интервјуто.