Лидерите на Европската Унија(ЕУ) и по вториот ден од маратонските преговори во Брисел не успеаја да постигнат договор за пакетот за економско опоравување што вклучува седумгодишен заеднички буџет и Фонд за обнова од последиците од кризата со Ковид-19. Дводневниот самит во Брисел, според најавите, ќе продолжи денеска, кога се очекува нов компромисен предлог од претседателот на Европскиот совет, Шарл Мишел.
Тој вчера излезе со нов предлог на самитот на ЕУ за трансфер на 50 милијарди евра од грантови на заеми од предложениот фонд за обнова на ЕУ. Се очекуваше вкупниот износ на Фондот да остане на 750 милијарди евра, но нивото на грантовите да се намали на 450 милијарди евра од предложените 500 милијарди евра, отстапка во согласност со барањата на т.н. „штедлива четворка“ – Австрија, Данска, Холандија и Шведска.
Мишел, исто така, понуди компромис за управување со фондот, во обид да ја убеди Холандија да го потпише договорот. За да ги намали грантовите, тој предложи кратења на неколку буџетски програми, вклучително и „Хоризонт Европа“ за две милијарди евра, здравствената програма за 2,7 милијарди евра и финансирање на рурален развој за пет милијарди евра. Покрај тоа, планираното финансирање од 26 милијарди евра за поддршка на солвентноста на компаниите ќе биде укинато.
Доколку и денеска не се постигне договор, лидерите на ЕУ треба повторно да се состанат во Брисел на 27 и 28 јули.