Сараево: Се зголемуваат тензиите пред утрешното јавно изрекување на пресудата за претседателот на Република Српска, Милорад Додик, за непочитување на одлуките на високиот претставник.
Додека се чека исходот од едногодишното судење, притисокот врз Судот на БиХ се зголемува. Веќе има одредени блокади во работата на државните институции, а има и закани за радикални потези. Во меѓувреме, трупите на ЕУФОР се распоредени во Сребреница, јавуват медиумите во БиХ.
Доколку правното насилство врз Република Српска не престане, и нема политичка волја и меѓународна поддршка Босна и Херцеговина да се врати на нејзините основи и да се трансформира во држава во која се почитуваат Дејтонскиот устав и законите, Република Српска е должна без одлагање да преземе мерки за да ја заштити својата дејтонска позиција исклучиво преку политички и правен пат, соопшти Владата на Републиока Српска.
Поради загрижувачките најави, ЕУФОР соопшти дека е во состојба на готовност, со зголемен број возила на улиците на Сребреница, а на состанокот членот на Претседателството Денис Беќировиќ го повика шефот на делегацијата на ЕУ, Луиџи Сорека, да го зачува мирот и дополнително да ги засили трупите на ЕУФОР.