Нови меѓуфракциски обвинувања во „Левица“. Здравко Савески, како предводник на една струја во движењето, го обвини Димитар Апасиев, лидер на другото крило, дека одработува за функција со самото прифаќање на поканата за средба со кандидатот за претседател на ВМРО ДПМНЕ, Гордана Сиљановска-Давкова.

„Паднаа маските! – Пред изборите кажавме дека Апасиев изврши пуч во „Левица“ преку фалсификување документи за поддршка на Сиљановска на изборите за потоа да фати некоја фотелја. И, како што гледаме, Апасиев почна да одработува за фотелјата“, коментира Савески.

Сега, вели тој, Апасиев се фали дека го добил спорот за „Левица“. Одлуката на судот, смета Савески, е резултат на политички монтиран процес и се темели на „несоборливи“ правни аргументи како „уважување на мејл наместо на записник со потпис и печат. Конкретно, за судот е меродавен мејлот на еден член на Президиумот на „Левица“ во кој се дава оставка, наместо да биде меродавен записникот од седницата на ЦК, со печат и потпис, од кој се гледа дека оставката е повлечена. Во врска со ваквата срамна одлука на судот, „Левица“ ќе поднесе жалба до апелација“.

ВМРО Апасиева, а не Левица, ја поддржа Сиљановска. Левица не дава поддршка ниту за неа ниту за Пендаровски. Во недела граѓаните ќе им влепат уште потежок шамар од корумпираните врхушки на СДСМ-ДУИ-ДПМНЕ, негласајќи за нивните кандидати!, вели Савески.